ކުއްލި ހާލަތްތަކުގައި ބަލި މީހުން ކަނޑުމަގުން އެއްތަނުން އަނެއް ތަނަށް ގެންދިއުމުގެ ޚިދުމަތް މިހާރަށް ވުރެ، އަވަސް އަދި ރައްކާތެރިކަމާއެކު ފޯރުކޮށް ދެވޭނެ އިންތިޒާމެއް ހަމަޖެއްސުމަށް މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީ އާއި މިނިސްޓްރީ އޮފް ހެލްތް އެންޑް ޖެންޑަ ގުޅިގެން ސީ އެމްބިއުލާންސްގެ ޚިދުމަތް ތަޢާރަފް ކުރަން ނިންމައިފި އެވެ.
ޑިފެންސް މިނިސްޓަރު ނާޒިމް ވިދާޅުވކުރިއަށް އޮތް ދެ މަސް ދުވަހުގެ ތެރޭގައި ރާއްޖޭގެ ހަތަރު ސަރަހައްދެއްގައި މި ޚިދުމަތް ފެށިގެން ދާނެ ކަމަށެވެ.
އަދި ކުރިއަށް އޮތް އެއް އަހަރުގެ ތެރޭގައި މުޅި ރާއްޖެއަށް ސީ އެމްބިއުލަންސްގެ ޚިދުމަތް ފެށިގެން ދާނެ ކަމަށް ވެސް ޑިފެންސް މިނިސްޓަރ ވަނީ ވިދާޅުވެފައެވެ.
އޭނާ ވިދާޅުވީ ސީ އެމްބިއުލަންސް ޚިދުމަތަކީ ސަރުކާރުގެ ސިއްހީ ވަޢުދާ ގުޅިފައިވާ ވަރަށް މުހިންމު މަސައްކަތެއް ކަމަށެވެ.
ނާޒިމް އިތުރަށް ވިދާޅުވީ މިކަން ކުރުމަށްޓަކައި ސަރުކާރުން ޚާއްސަ ބަޖެޓެއް ކަނޑައެޅިގެން ދާނެ ކަމަށެވެ.
އެހެން ނަމަވެސް ކުރިމަގުގައި އދ އާއި ރެޑް ކްރެސެންޓް ފަދަ ބޭރުގެ ބޮޑެތި ޖަމާޢަތްތަކުގެ މާލީ އަދި ފަންނީ އެހީ މި ޚިދުމަތައް ހޯއްދަވާނެ ކަމަށާއި މީގެ ސަބަބުން ސަރުކާރުގެ ބަޖެޓަސް ބަރޯސާވުމުގެ ބައި ވަރަށް ބޮޑަށް ކުޑަވެގެންދާނެެ ކަމަށެވެ.
ހެލްތު މިނިސްޓަރު ޑރ. މަރިޔަމް ޝަކީލާ ވިދާޅުވީ މިޚިދުމަތުގެ މައިގަނޑު ރޫޙަކީ ބަލިމީހާ މާލެ ގެނައުން ނޫން ކަމަށާއި، ބަލި މީހާ އަށް ފަރުވާ ލިބޭ އެންމެ ކައިރި މަންޒިލަށް ރައްކާތެރިކަމާއެކު ގެންގޮސް ދިނުން ކަމަށެވެ.
އަދި މިހާރު މި ޚިދުމަތް އެންމެ އެދެވޭ ގޮތުގައި ދިނުމަށްޓަކައި ބޮޑެތި ގޮންޖެހުންތައް ހުރިކަން ފާހަގަ ކުރައްވަމުން، މި ތަޢާރަފު ކުރެވޭ ޚިދުމަތުން ރައްޔިތުންނަށް ލުއި ފަސޭހަތަކެއް ލިބިގެން ދާނެ ކަމަށް ވިދާޅުވި އެވެ.
ސީ އެމްބިއުލާންސްގެ ޚިދުމަތް ކުރިއަށްއޮތް ދެ މަސް ދުވަހުގެ ތެރޭގައި ތަޢާރަފް ކުރުމަށް ހަމަޖެހިފައިވާއިރު، މިޚިދުމަތް ރައްޔިތުންނަށް ފޯރުކޮށްދެވޭނީ ހެލްތު މިނިސްޓްރީން ކަނޑައަޅާ ނިޒާމެއްގެ ތެރެއިންނެވެ.
މިކަމަށްޓަކައި ޚިދުމަތް ލިބިގަންނަ ފަރާތް ޢަމަލުކުރަންވީ ގޮތްތަކާއި ޚިދުމަތް ލިބޭނީ ކިހިނެއްކަން ކަނޑައެޅި، އެކަން ވަރަށް އަވަހަށް ރައްޔިތުންނަށް ހާމަ ކުރެވިގެން ދާނެ ކަމަށް ވެސް ހެލްތު މިނިސްޓަރު ވަނީ ވިދާޅުވެފައެވެ.