ސ. ގަން އެއާޕޯޓްގެ މުވައްޒަފުންގެ މުސާރަ އިން އުނި ކުރި ފައިސާގެ ތެރެއިން މިހާތަނަށް ނުލިބި ހުރި ފައިސާ އާ ގުޅޭ ކަންކަން ބަލަމުން އަންނަ ކަމަށް އައްޑޫ އިންޓަނެޝަނަލް އެއާޕޯޓް (އޭއައިއޭ) އިން ބުނެފި އެވެ.
އެ ކުންފުނީގެ މެނެޖިން ޑިރެކްޓަރު އާދަމް އާޒިމް މިއަދު ވިދާޅުވީ މުވައްޒަފުންގެ މުސާރަ އިން އުނި ކުރި ފައިސާގެ ތެެރެއިން ބައެއް ފައިސާ ނުލިބުގެ ޝަކުވާތަކެއް ލިބިފައިވާ ކަމަށެވެ.
"އަޅުގަނޑު މަގާމާ ހަވާލުވި ފަހުން އެކަހަލަ ޝަކުވާތަކެއް ލިބުނު. އެކަން ބަލަމުން މި އަންނަނީ. އެއްވެސް މުވައްޒަފަކަށް ލިބެން ޖެހޭ ފައިސާއެއްވާ ނަމަ އެ ފައިސާ ލިބޭނެ،" އެސްޓީއޯގެ އެމްޑީކަން ވެސް ކުރައްވާ އާޒިމް ވިދާޅުވި އެވެ.
އެހެން ނަމަވެސް އެ ފައިސާ ލިބޭނެ ދުވަހެއް އޭނާ ވިދާޅެއް ނުވެ އެވެ.
ގަން އެއާޕޯޓްގެ މުވައްޒަފުންގެ އޭއައިއޭގެ ދަށަށް ބަދަލުކޮށް މުސާރަ އިން، 13 މަހުގެ ފައިސާ 2009 ގައި އުނިކޮށްފައިވެ އެވެ.
އެހެން ނަމަވެސް އޭގެ ތެރެއިން ހަތަރު މަހުގެ ފައިސާ ވަނީ ދީފަ އެވެ. ބާކީ އަށް މަހުގެ ފައިސާ ލިބުން ލަސްވެ، އެ ފައިސާ ލިބޭނެ ކަމުގެ ޔަގީންކަން ވެސް ނުދޭތީ މުވައްޒަފުން މިހާރު ދަނީ ކަންބޮޑުވުން ފާޅު ކުރަމުންނެވެ.
އޭއައިއޭ އިން ޖެނުއަރީ 22، 2012 ގައި ނެރެފައިވާ ނޯޓިހެއްގައި ބުނަނީ 2010 ވަނަ އަހަރު މުވައްޒަފުންގެ މުސާރަ އިން އުނި ކުރި ފައިސާގެ ތެރެއިން މިހާރު ނުދެވި ހުރި މަސްތަކުގެ ފައިސާގެ މައްސަލަ ވަނީ ކުންފުނީގެ ބޯޑަަށް ހުށަހަޅާފައި ކަމަށެވެ. އަދި އެކަމާ ބޯޑުން މަޝްވަރާ ކުރަމުން އަންނަ ކަމަށެވެ.
އޭއައިއޭ އިން ބުނީ ނުދެވި ހުރީ މެއި 2010 އިން އެ އަހަރުގެ ޑިސެމްބަރު މަހުގެ މުސާރަ އިން އުނި ކުރި ފައިސާ ކަމަށެވެ.
"އެހެންކަމުން ފައިސާގެ ކަންތަކާ ގުޅޭ ގޮތުން ބޯޑުން ނިންމާ ގޮތެއް މުވައްޒަފުންނާ ހިއްސާ ކުރަމުން ގެންދާނެ ވާހަކަ މައުލޫމާތަކަށްޓަކައި ދެންނެވީމެވެ." ނޯޓިހުގައިވެ އެވެ.
އެހެން ނަަމަވެސް އެ ފައިސާ އަށް ލިބޭނެ ދުވަހެއް ކުންފުނިން ޔަގީންކަން ނުދޭތީ މުވައްޒަފުން ތިބީ ވަރަށް ބޮޑަށް ހިތްހަމަނުޖެހިފަ އެވެ. މިކަމާ ބައެއް މުވައްޒަފުން ފާޅުގައި ވާހަކަ ދެެއްކި ނަމަވެސް، ވަޒީފާ އިން ވަކިކޮށްފާނެ ކަމުގެ އިންޒާރު ދީފައިވާ ކަމަށް ބުނެ، ބައެއް މުވައްޒަފުން ފައިސާ ލިބުން ލަސްވުމުގެ ޝަކުވާއެއް ނުކުރެ އެވެ.
"މަޑުން ތިބެގެން އަޅުގަނޑުމެންގެ ހައްގެއް ނުލިބޭނެ. މިކަމާ ވެއްޖެ ހުރިހާ މުވައްޒަފުން އެކަތިގަނޑަކަށް ވެގެން ނިކުންނަން. އަޅުގަނޑުމެން ހޯދަން މި އުޅެނީ އަޅުގަނޑުމެންގެ އަމިއްލަ ހައްގެއް. ކުންފުނިން މިހާތަނަށް މުވައްޒަފުންނާ ދޭތެރޭ ކަންތައް ކުރަނީ ވަރަށް އިހާނެތިކޮށް،" މުވައްޒަފަކު ބުންޏެވެ. "މި ލާރި ހޯދަން އަޅުގަނޑުމެންނަަށް ކުރެވެން ހުރި ހުރިހާ މަސައްކަތެއް ކުރާނަން."