އެކި ހާދިސާތަކުގައި މިއަދުގެ މިހާތަނަށް ހަތަރު މަރެއްގެ ހަބަރު ލިބިއްޖެ އެވެ. ފާއިތުވި ހަފްތާއިން ފެށިގެން ކޮންމެ ދުވަހަކު ކަހަލަ ގޮތައް ރާއްޖެއިން ވަނީ ކުއްލި މަރުގެ ހާދިސާތައް ހިނގާފަ އެވެ.
މިއަދު އެންމެ ފުރަތަމަ ލިބިފައިވަނީ ރޭ ދަންވަރުގެ ވަގުތެއްގައި އައްޑޫ ސިޓީ ހިތަދޫގައި ހިނގި އެކްސިޑެއްގައި ޒުވާނަކު މަރުވި ހަބަރެވެ. ބާރު ސްޕީޑުގައި ދުއްވާފައި ދިޔަ ސައިކަލު ކޮންޓްރޯލް ނުވެ ގޮސް ފާރެއްގައި ޖެހި ހިނގި މި އެކްސިޑެންޓްގައި މަރުވީ އުމުރުން 24 އަހަރުގެ ޒުވާނެކެވެ.
އޭގެ ފަހުން ދެން ލިބިފައިވަނީ މާލޭ އިއްޒުއްދީން ފާލަމާ ދިމާލުން ބޭރުތޮށީގައި މަސްބާނަން ހުރި މީހަކު ވަޔާއެކު މޫދަށް ވެއްޓި، ލިބުނު ޒަހަމްތަކަށް ފަރުވާދެމުން ދަނިކޮށް މަރުވި ހަބަރެވެ. މަސްބާނަން ހުއްޓާ މޫދަށް ވެއްޓި މަރުވެފައިވަނީ ދިވެހި ފިރިހެނެކެވެ. ފުލުހުން ބުނީ މީހަކު ވަޔާއެކު މޫދަށް ވެއްޓިގެން އެކަމުގެ މައުލޫމާތު ލިބިފައިވަނީ ހެނދުނު 06:05 ހާއިރު އެވެ. އަދި އޭނާ ހޮސްޕިޓަލަށް ގެންގޮސް ފަރުވާދެމުން ދަނިކޮށް މަރުވީ، 07:20 ހާއިރު ކަމަށް ފުލުހުން ވަނީ ބުނެފަ އެވެ.
އޭގެ ފަހުން ލިބިފައިވަނީ ކޮވިޑް-19 އަށް ފަރުވާ ހޯދަމުން ދިޔަ ކުޑަ ކުއްޖަކު ގދ. ތިނަދޫގައި ނިޔާވި ހަބަރެވެ. މައުލޫމާތު ލިބިފައިވާގޮތުގައި ތިނަދޫ ކޮވިޑް ފެސިލިޓީގައި ފަރުވާ ދެމުންދަނިކޮށް ނިޔާވެފައިވަނީ އުމުރުން ތިން މަހުގެ ފިރިހެން ކުއްޖެކެވެ.
އޭގެ ފަހުން އަނަންތަރާ ދިގު މޯލްޑިވްސް ރިސޯޓުން މަރުވެފައި އޮތް ފަތުރުވެރިއަކު ފެނުން ހަބަރު ވަނީ ލިބިފަ އެވެ. އެހެން ނަމަވެސް ފުލުހުން ބުނެފައިވަނީ އެ ރިސޯޓުގެ ބީޗު ސަރަހައްދުގައި ފަތުރުވެރިއަކު މަރުވެފައި އޮށްވާ ފެނުނީ އިްޔެ ކަމަށެވެ. މަރުވެފައިވަނީ 35 އަހަރުގެ ކޮރެއާ ފިރިހެނެއްކަމަށާއި، މިކަމާ ގުޅިގެން ބަލަންޖެހޭކަންކަން ބަލަމުން އަންނަކަމަށް ފުލުހުން ބުނެފައިވެއެވެ.
މިއަދުގެ މިހާތަނަށް ހަތަރު މަރެއްގެ ހަބަރު ލިބިފައިވާއިރު ފާއިތުވި ދެތިން ދުވަސް ތެރޭގައި ކުއްލި މަރުގެ ހަބަރުތައް ވަނީ ލިބިފަ އެވެ. އެގޮތުން އިއްޔެ ވެސް ވަނީ ކޮވިޑް-19 ގައި ރާއްޖެއިން އިތުރު މީހަކު މަރުވެފަ އެވެ. އަދި މިދިޔަ ހޮނިހިރު ދުވަހު ވަނީ ގއ.ރެފްލްސް މޯލްޑިވްސް ރިސޯޓުގައި މަސައްކަތް ކުރަމުންދިޔަ ބިދޭސީއަކު މަރުވެފައި އޮއްވާ ފެނިފަ އެވެ. އޭގެ އިތުރުން ކަނޑުމަތީގައި ހޮނިހިރު ދުވަހު ހިނގި ނުރައްކާތެރި ހާދިސާގައި ކުޑަ ކުއްޖަކު ގެއްލި އެކަކު ވަނީ ދުނިޔެ ދޫކޮށްފަ އެވެ.
މި ވަގުތުވެސް ކަނޑުމަތިން ދެ މީހަކު ގެއްލިގެން ދަނީ ހޯދަމުންނެވެ.