އަޑު ނީވޭ އަދި މަންމަނު ކުދިންނާ މުއާމަލާތް ކުރާނެ ގޮތް ދަސްކޮށްދޭ ކޯހެއް ހުޅުމީދުގައި ފަށައިފި އެވެ.
އެ ރަށުން ދެ ޖިންސްގެ 25 ޒުވާނުން ބައިވެރިވާ މި ކޯހަކީ 15 ދުވަހުގެ މުއްދަތަށް ހިންގާ ކޯހެއް ކަމަށް، ކޯހަށް އެހީތެރިކަން ފޯރުކޮށްދޭ ޝަހީޒް އަބްދުﷲ ވިދާޅުވި އެވެ.
އޭނާ ވިދާޅުވީ އައްޑޫ ސިޓީ ކައުންސިލާއި ރައްޔިތުންގެ މަޖިލީހަށް އެމްޑީޕީ ޓިކެޓްގައި ހުޅުދޫ ދާއިރާ އަށް ކުރިމަތިލައްވާ ހުޅުދޫ ދެތަނޑިމާގޭ އިބްރާހީމް ހަމީދް (ހަޒާޝް ހަމީދު) ގެ އެހީތެރިކަން ވެސް ވަރަށް ބޮޑަށް ލިބިގެން ހިންގާ ކޯހުގައި ބައިވެރިންނަށް ކިޔަވައި ދިނުމުގެ މަސައްކަތް ކުރަނީ އޯލެވެލް ވެސް ނިންމާފައިވާ ހުޅުމީދު އަށް ނިސްބަތްވާ ހާއްސަ އެހީއަށް ބޭނުންވާ ޒުވާނެއް ކަމަށްވާ މުހައްމަދު އަފްވާމް ކަމަށެވެ.
ޝަހީޒް ވިދާޅުވީ 15 ދުވަހަށް ހިންގާ ކޯސް ނިމޭ އިރު، ބައިވެރިންނަށް އަޑު ނީވޭ އަދި މަންމަނު ކުދިންނާ ސައިން ލޭންގްއޭޖް ބޭނުންކޮށްގެން ވަރަށް ރަނގަަޅަށް މުއާމަލާތް ކުރަން އެނގޭނެ ކަމަށެވެ.
އަދި މިފަދަ ކޯހެއް ހިންގުމުގެ އެންމެ ބޮޑު ބޭނުމަކީ އެކަހެރިވެފައި ތިބި ހާއްސަ އެހީއަށް ބޭނުންވާ ކުދިން މުޖުތަމަށް ނެރެ، އެ މީހުންނަށް ވެސް އެހެން މީހުންނެކޭ އެއްގޮތަށް ކުރިއަށް ދެވޭނެ ފުރުސަތުތައް ހުޅުވައި ދިނުން ކަމަށެވެ.
ކޯސް ނިންމުމަށް ފަހު ފާސްވާ ކުދިންނަށް ސެޓްފިކެޓް ދޭން ވެސް ވަނީ ހަމަޖެހިފަ އެވެ.