އައްޑޫގައި ހަދާފައިވާ ޕެކޭޖިން ސެންޓަރު ހިންގާނެ ފަރާތެއް ހޯދަން އިކޮނޮމިކް މިނިސްޓްރީން ދެވަނަ ފަހަރަށް އިއުލާންކޮށްފި އެވެ.
ޕެކިން ސެންޓަރު ހިންގުމަށް ބީލަން ހުށަހެޅުމުގެ ފުރުސަތު މިދިޔަ އޮގަސްޓް 27 ގައި ވެސް ހުޅުވާލި އެވެ.
އެކަމަކު އޮކްޓޯބަރު 1، 2013 ގެ ނިޔަލަށް ބީލަން ހުށަހެޅުމުގެ ފުރުސަތު ހަމަވި އިރު އެކަމަށް މާ ބޮޑު ތަރުހީބެއް ލިބިފައެއް ނުވެ އެވެ.
މިނިސްޓްރީން ނެރުނު ބަޔާނެއްގައި ބުނީ ކުދި އަދި މެދު ފަންތީގެ ވިޔަފާރި ކުރިއެރުވުމަށް އިތުރު ފުރުސަތުތައް ލިބެން އޮތީ އުފައްދާ ތަކެތި ރަނގަޅު ފެންވަރަށް ޕެކޭޖް ކުރުމުގެ މަގު ހުރިހާ ފަރާތްތަކަށް ވެސް ލިބިގެން ކަމަށެވެ.
އަދި ދަނޑުވެރިކަމުގެ އުފެއްދުންތަކުގެ ވިޔަފާރި އާއި ޕްރޮސެސްކުރެވޭ އެކި ކާބޯތަކެތި އުފައްދާ ކުދި ވިޔަފާރިތައް ތަރައްގީވަމުން އަންނަ ކަމަށް ވެސް އެ މިނިސްޓްރީން ބުންޏެވެ.
ޕެކިން ސެންޓަރުތައް ހިންގުމަށް ބީލަން ހުށަހެޅުމުގެ ފުރުސަތު ހަމަވާނީ އަންނަ ފެބްރުއަރީ 13 ވަނަ ދުވަހުގެ 2:00 އެވެ.
އެ ތަންތަން ކުއްޔަށް ނަގައިގެން ހިންގަން ބޭނުންވާ އަމިއްލަ ފަރާތްތަކަށް ފަސް އަހަރުގެ މުއްދަތަށް ދޫކުރަން ވަނީ ނިންމާފަ އެވެ.
އައިޑީބީގެ އެހީގައި ސ. ފޭދު އާއި ކުޅުދުއްފުށީގައި ހަދާފައިވާ ދެ ޕެކިން ސެންޓަރު މިހާރު ވަނީ ނިމިފަ އެވެ.
އެ ސެންޓަރުތަކުގައި ދިވެހި އެކި އުފެއްދުންތައް ޕެކް ކުރެވޭނެ ހުރިހާ މެޝިނަރީތަކެއް ވެސް ވަނީ ބަހައްޓައިފަ އެވެ.