ދިވެހި ފިލްމީ ދާއިރާ އަށް މިދިޔަ އަހަރަކީ ވަރަށް ހީނަރު އަހަރެެކެވެ. ސިޔާސީ ހަލަބޮލިކަމެއްގެ ތެރޭގައި ރާއްޖެ މިދިޔަ އަހަރު އޮތުމާ އެކު، ސިނަމާ އަށް އައިސްފައި ވަނީ ވެސް އެންމެ ތިން ފިލްމެވެ.
އެއީ ހުސައިން މުނައްވަރު ޑައިރެކްޓްކޮށް، ނިއުމާ މުހައްމަދާއި އިސްމާއީލް ރަޝީދު (ކޮޕީ އިއްސެ)، ގެ އިތުރުން ރިޝްފާ އާއި މުހައްމަދު ފައިސަލް އަދި މުހައްމަދު މަނިކު ލީޑް ރޯލް ކުޅުނު "ދިލަކަނި" ގެ އިތުރުން ރަވީ ފާރޫގް ޑައިރެކްޓް ކުރި "އިނގިލި" އެވެ.
އަނެއް ފިލްމަކީ ރާއްޖޭގެ ފުރަތަމަ 3ޑީ ފިލްމް "ފަތިސްހަނދުވަރުގެ ފެށުން" އެވެ.
ބިންމާ އިބްރާހީމް ވަހީދުގެ ވާހަކަ "ޖިނާ" އަަސްލަކަށް ބަލައިގެން އަލީ ޝިފާއު ޑައިރެކްޓް ކުރި އެ ފިލްމުގެ ލީޑް ރޯލް ކުޅެފައި ވަނީ ޔޫސުފް ޝަފީއު (ޔޫއްޕެ) އާއި ފާތުމަތު ފަރީލާ އެވެ.
އެންމެ ތިން ފިލްމުން މިދިޔަ އަހަރު ނިންމާލި އިރު މި އަހަރު ރިލީޒް ވާނެ ކަމަށް ބެލެވޭ ގިނަ ފިލްމްތަކެއް އެބަ ހުއްޓެވެ. ކުރު ގޮތަކަަށް މީގެ ތެރެއިން ބައެއް ފިލްމުތަކަށް ބަލައިލުން ކިހިނެއް ވާނެ ބާވަ އެވެ؟
* އަނިޔާ: މިއީ މަޝްހޫރު ޑައިރެކްޓަރު އަހުމަދު ނިމާލްގެ ފިރިހެން ދަރިފުޅު ޖުމައްޔިލް ނިމާލް ލޯންޗް ކުރާ ފިލްމެވެ. ނިމާލް ޑައިރެކްޓް ކުރާ މި ފިލްމުގެ މުހިއްމު ރޯލްތަކުން ނިއުމާ މުހައްމަދު ކޮޕީ އިއްސެގެ އިތުރުން ފަރީލާ ވެސް ފެނިގެން ދާނެ އެވެ.
އެނގިފައިވާ ގޮތުގައި "އަނިޔާ" ސިނަމާ އަށް އަންނާނީ ފެބްރުއަރީ މަހުގެ 25 ގަ އެވެ.
* އާދޭސް: މިއީ އެފަދަ ދެވަނައެއް ނެތް އަބްދުލް ފައްތާހުގެ ޑައިރެކްޝަނެކެވެ. މި ފިލްމުގެ މަސައްކަތް ވަނީ 2012 ގައި ނިންމައިފަ އެވެ. އެކަމަކު ފިލްމްގެ ޕްރޮޑިއުސަރު ޑޭޝް ހަސަން އަލީ ނިޔާވުމާ ގުޅިގެން، ފިލްމް މިހާތަނަށް ސްކްރީނަށް ހަމައަށް ގެނެވޭ ވަރެއް ނުވެ އެވެ.
މި ފިލްމުގައި ލީޑް ރޯލް ކުޅެފައި ވަނީ ނިއުމާއި މޫސާ ޒަކަރިއްޔާގެ އިތުރުން އާމިރާއި ހުސައިން ސޮބާހެވެ. އަދި ސަޕޯޓިން ރޯލްތަކުން އަޒޫ އާއި އަލީ އާޒިމް (ދޮން އައްޔަ) ފެނިގެން ދާނެ އެވެ.
* މިކޮއި ބައްޕަ ބައޭބައޭ: މިއީ ރަވީ ފާރޫގް، މަހުދީ އަހުމަދުގެ ސްކްރީންޕްލޭއަކަށް ތައްޔާރުކޮށްފައިވާ ތްރިލާއެކެވެ. ޑާކް ރެއިން އެންޓަޓެއިންމަންޓުން އުފައްދާފްއިވާ މި ފިލްމުގެ ލީޑް ތަރިންނަކީ މުހައްމަދު މަނިކާއި އައިޝަތު ރިޝްމީ އެވެ.
* އިންތިހާ: މިއީ ވެސް މަސައްކަތް ނިމިފައި އޮންތަނާ ގިނަ ދުވަސްތަކެއްވެފައިވާ ފިލްމެކެވެ. ޔޫއްޕެގެ ސްކްރީންޕްލޭއަކަށް އޭނާ ޑައިރެކްޓްކޮށް، އެކްޓް ވެސް ކޮށްފައިވާ "އިންތިހާ" ގެ އިތުރު ތަރިންގެ ތެރޭގައި ސޮބާ އާއި މަރިޔަމް އަފީފާގެ އިތުރުން ފައިސަލާއި ފަރީލާ ހިމެނެ އެވެ.
މިއީ ސޮބާގެ އިލެވެން އިލެވެން ޕްރޮޑަކްޝަނުން އުފައްދައި، ސްރީ ލަންކާގައި ޝޫޓްކޮށްފައިވާ ފިލްމެކެވެ.
* 24 ގަޑިއިރު: މިއީ މިދިޔަ އަހަރު ސްކްރީނަށް އަންނާނެ ކަމަށް ވަރަށް ބޮޑަށް ބެލެވުނު ފިލްމެކެވެ. ޔޫއްޕެ އާއި އޮސްޓްރޭލިއާގެ ބަތަކާއެއް ކަމަށްވާ ސާތާ އާއި އަޒޫ ލީޑް ރޯލް ކުޅެފައިވާ މި ފިލްމަކީ ދަރާ މުހައްމަދު ރަޝީދު ޑައިރެކްޓްކޮށްފައިވާ ފިލްމެކެވެ.
މިއީ މަޑުލު މުހައްމަދު ވަހީދުގެ ވާހަކައެއްގެ މައްޗަށް ބިނާކޮށް، އިސްމާއީލް ޝަފީއު ޕްރޮޑިއުސްކޮށްފައިވާ ފިލްމެކެވެ.
* ހުޅުދާން: މިއީ އައިޝަތު ފުއާދުގެ ވާހަކައަކަށް އަލީ ޝިފާއު ޑައިރެކްޓް ކުރާ އާއިލީ ފިލްމެކެވެ. ފިލްމުގެ މުހިއްމު ތަރިންގެ ތެރޭގައި އަލަށް ތައާރަފްވާ މަޖޫ އާއި ރޯނު ހަސަން މަނިކުގެ އިތުރުން މަރިޔަމް ޝަކީލާ އާއި އަހުމަދު ސައީދު ފަދަ ތަރިން ހިމެނެ އެވެ.
* ހަތަރު ހަޅަ: މިއީ ރާއްޖޭގެ ފުރަތަމަ އެންތޮލޮޖީ ފިލްމެވެ. ހަތަރު ޑައިރެކްޓަރެއްގެ ހަތަރު ސެގްމަންޓް އެކުލެވޭ މި ފިލްމުގައި ފައްތާތުގެ ސެގްމެންޓަކީ "ދަރި/ފިރި" އެވެ. ރަވީގެ ސެގްމަންޓަކީ "ގާތިލް" އެވެ. އަދި މުއުމިން ފުއާދުގެ ސެގްމެންޓަށް "ބައިވެރިޔާ" ކިޔާފަައިވާ އިރު، އަލީ ޝިފާއުގެ ސެގްމަންޓަކީ "ފޮށި" އެވެ.
މިއީ އެއް ފިލްމަކުން ގިނަ އަދަދެއްގެ ތަރިން ފެނިގެން ދާނެ ފިލްމެކެވެ. މީގެ ތެރޭގައި އަލަށް ތައާރަފްވާ މޫނުތައް ވެސް ހިމެނެ އެވެ.
* އުދަބާނި 2: މިއީ އަމްޖަދު އިބްރާހީމް 2010 ގައި ގެނެސްދިން ކާމިޔާބް ބިރުވެރި ފިލްމް "އުދަބާނި" ގެ ސީކްއެލްއެކެވެ. މުހައްމަދު ގާސިމްގެ ވާހަކައަކަށް ތައްޔާރު ކުރާ މި ފިލްމުގެ ތަރިންނަކީ ޔޫއްޕެ އާއި އާމިރާ އެވެ.