އޭ އިންސާނާ އެވެ. ތިބާއަކީ މި ދުނިޔޭގައި އަބަދުމެ ދިރިހުންނާނޭ މީހެއް ފަދައިން ދުނިޔަވީ ކަންކަމުގައި މަސްއޫލުވެގެން އުޅޭ މީހެއްކަމުގައި ނުވާށެވެ. މުދާ ގިނަކުރުމާއި ދަރިން ގިނަކުރުމުގެ ސަބަބުން ﷲ ގެ ޙަޟުރަތުން ޣާފިލުވާ މީހެއްކަމުގައި ތިބާ ނުވާށެވެ.
އޭ އިންސާނާ އެވެ. ތިބާއަކީ މި ދުނިޔޭގައި އަބަދުމެ ދިރިހުންނާނޭ މީހެއްފަދައިން ދުނިޔަވީ ކަންކަމުގައި މަސްއޫލުވެގެން އުޅޭ މީހެއްކަމުގައި ނުވާށެވެ. މުދާ ގިނަކުރުމާއި ދަރިން ގިނަކުރުމުގެ ސަބަބުން ﷲ ގެ ޙަޟުރަތުން ޣާފިލުވާ މީހެއް ކަމުގައި ތިބާ ނުވާށެވެ. ޝައްކެއް ވެސް ނެތް ގޮތުގައި ތިބާ އާ މަރު އައިސް ކުރިމަތިލާނެ އެވެ. އެ މަރު އައިސް ތިބާ އާ ކުރިމަތިލާނީ ކޮން އިރަކު ކޮން ގޮތަކަށް ކަމެއް ވެސް ތިބާއަކަށް ނޭނގޭނެ އެވެ.
އަދި ތިބާ މަރުވާނީ ކޮންތާކު ކަމެއް ވެސް ދެނެވޮޑިގެންވަނީ ﷲ އެވެ. މިއަދު ތިބާ ހުރީ ފުރިހަމަ ޞިއްޙަތުގައިކަމުގައި ވެދާނެ އެވެ. ނަމަވެސް ތިބާ ބަލިވާނީ ކޮން އިރަކު ންކަމެއް ތިބާ އަށް އެނގޭނެ ހެއްޔެވެ؟
އެ ޞިއްޙަތު ދެއްވި ގަދަ ކީރިތިވަންތަ ﷲ އެ ޞިއްޙަތު ގެންދަވާނީ ކޮން އިރަކުން ކަމެއް ހަމަ އެކަކަށް ވެސް ނޭނގޭނެ އެވެ. ތިބާގެ އެންމެހާ ކަންކަމެއް މިލްކުވެ ވޮޑިގެންވަނީ އެކަލާނގެ ޙަޟުރަތަށެވެ.
އޭ އިންސާނާ އެވެ. ތިބާއަކީ ދުނިޔެއަށް އައިސް އުޅޭ ދަތުރުވެރިއެއް ފަދަ މީހެކެވެ. ތި ދަތުރުވެރިޔާގެ ދާއިމީ މަންޒިލެއްކަމުގައި މި ދުނިޔެ ނުވާނެކަން ދަންނާށެވެ! މިއަދު ތިބާއަށް ލިބިފައިވާ ވަގުތުގެ ބޭނުން ހެޔޮގޮތުގައި ހިފާށެވެ!
އޭ ދަތުރުވެރިޔާ އެވެ! ތިބާގެ ފުރިހަމަ ޞިއްޙަތުގައި ތިބާ އަށް އަދާ ހަމައަށް ކުރެވުނީ ކޮން ކަމެއްތޯ ނިކަން އަމިއްލަ ނަފްސާއި ސުވާލުކޮށްލާށެވެ!
ފަރުޟު ފަސް ނަމާދު ބަރާބަރަށް އަދާކުރެވުނު ހެއްޔެވެ؟ ޤުރުއާނުން ކަލިމައެއް ކިޔައިލެވުނު ހެއްޔެވެ؟ ނިކަމެއްޗަކަށް އެހީތެރިކަމުގެ އަތެއް ދިއްކޮށްލެވުނު ހެއްޔެވެ؟ ނުކުޅެދޭ މީހާއަށް އޯގާތެރިކަމުގެ ލޮލަކުން ބަލައިލެވުނު ހެއްޔެވެ؟ ހެޔޮ ކަންކަމަށް އަވަސްވެ ގަތީމު ހެއްޔެވެ؟
މި ސުވާލުތަކުގެ ކުރިމަތީގައި އިސްޖަހާލަން ޖެހޭ މީހާއަށް ހުރި ހިތާމައެއްގެ ބޮޑުކަމާ އެވެ. އެފަދަ މީހެއް ނަމަ ތިމާއަށް ﷲ ދެއްވާފައިވާ ޞިއްޙަތަށްޓަކައި ޝުކުރުވެރިވެ މި ދެންނެވުނު ކަންކަމަށް އަވަސްވެގަތުން ހުއްޓެވެ. ތައުބާވެ އެކަލާނގެ ޙަޟުރަތަށް ރުޖޫޢަވުން ހުއްޓެވެ. ތިމާއަށް ލިބިފައިވީ ޞިއްޙަތު ބީވެގެން ދިއުމުގެ ކުރިންނެވެ.
އޭ ދަތުރުވެރިޔާ އެވެ! ތިބާތި ކުރާ ދަތުރުގެ ދިގުމިން ތިބާއަކަށް ނޭނގޭނެ އެވެ. ތިބާގެ މަންޒިލް ވާނީ ކޮންތާކު ކަމެއް ވެސް ނުމެ އެނގޭނޭމެ އެވެ. ތި ދަތުރުގައި ތިބާގެ ވަގުތުތައް ހޭދަކުރީ ކޮން ކަމަކުތޯ ސުވާލުކޮށްލާށެވެ! ތިބާގެ ދުވަސްތައް ހޭދަ ކުރީ މަޖަލާއި ކުޅިވަރުގައި ހެއްޔެވެ؟ ނޫނީ ފާފަތައް ކުރުމުގައި ހެއްޔެވެ؟ ނޫނީ މީހުންނަށް ފުރައްސާރަ ކުރުމުގައި ހެއްޔެވެ؟ ނޫނީ ކޮންމެވެސް ބޭކާރު ކަމެއް ކުރުމުގައި ހެއްޔެވެ؟
މި ސުވާލުތަކަށް އިސްޖަހާލަން ޖެހިއްޖެމީހާ ހިތާމަ ކުރާށެވެ! ތިބާ އަށް މި ދުނިޔޭގައި ލިބިފައިވީ އަގުހުރި ވަގުތުތައް ބޭކާރުކޮށްލީ އެވެ. ދެން ފާއިތުވި ތަނެއް ނާންނާނެ އެވެ.
ނަމަވެސް ދުނިޔޭގައި ދެން ވެސް ދިރިހުރި ހިނދުކޮޅުގެ ބޭނުން ހެޔޮ ގޮތުގައި ކުރާށެވެ. ލޯ މަރާލަން ޖެހޭ ވަގުތު އައުމުގެ ކުރިން ތައުބާވެ ރުޖޫޢަވާށެވެ! މިއީ ހެޔޮ ހިތުން އަޅުގަނޑު ދޭ ނަޞޭޙަތެކެވެ.
އޭ ދަތުރުވެރިޔާ އެވެ! މި ދުނިޔެއަކީ ވަގުތީ މަންޒިލެކެވެ. ﷲ އަށް ބިރުވެތިވާ މަޑުމޮޅި ހިތަކާއިގެން ދުނިޔޭގައި ދިރިއުޅޭށެވެ. އެކަލާނގެ ދުނިޔެމަތީގައި ތިޔަ އިންސާނާއަށްޓަކައި ލައްވާފައިވާ މަތިވެރި ނިޢުމަތްތަކަށް ޝުކުރުވެރިވެ އެ ނިޢުމަތްތަކުގެ ބޭނުން މި ވަގުތީ ޙަޔާތުގައި އެންމެ އެދެވޭ ގޮތުގައި ހިފާށެވެ.
ތިބާގެ ތިޔަ ދަތުރުގެ ނިމުން އަންނާނީ ކޮން ވަގުތެއްގައި ކަމެއް ތިބާއަކަށް ނޭނގެ އެވެ. މާދަމާ އަށް ތިބާ ތިޔަ ރާވާ ކަންކަން ކޮށް ނިމެންދެން ދުނިޔޭގައި ހުންނާނެ ކަމެއް ހަމަ އެއްގޮތަކަށް ވެސް ނޭނގޭނެ އެވެ.
ދަތުރު ނިމުމަށް ފަހު، ދެން ކަޑައްތު ކުރަން ހުރި މަންޒިލްތައް ފަސޭހަވާނީ ދުނިޔޭގެ މިދަތުރު ކާމިޔާބުކަމާ އެކު ނިންމާލެވުނީމަ އެވެ. ދުނިޔޭގެ ދަތުރު ނިޔާމަ ކުރާށެވެ. އޭރުން މާދަމާގެ ދަތުރު ތިބާއަށް ނިޔާމަ ދަތުރެއް ކަމުގައި ވާނެކަން ޔަޤީނެވެ.