ކޮވިޑް-19ގެ ޑެލްޓާ ވޭރިއަންޓަށްވުރެ އެތައް ގުނައެއް ހަލުވިކަމާއެކު ޑެލްޓާ ޕްލަސް ވޭރިއެންޓް ފެތުރޭކަމަށް އިނގިރޭސިވިލާތުގެ މާހިރުން ބުނެފިއެވެ.
އިނގިރޭސިވިލާތުގެ ހެލްތު ސެކިއުރިޓީ އޭޖެންސީން ހާމަކޮށްފައިވާ ގޮތުގައި މި ވޭރިއަންޓާ ބެހޭ ދިރާސާތައް މިހާރު އަންނަނީ ކުރެވެމުންނެވެ.
އެގޮތުން މި ވޭރިއަންޓުން ބަލީގައި އިތުރަށް ބޮޑުވަރު ވާކަމަކަށް އެނގިފައިނުވާ ކަމަށާއި، ވެކްސިން މަސައްކަތް ކުރާކަމަށް އެ އޭޖެންސީން ވަނީ ބުނެފައެވެ. ހަމައެހެންމެ، އެންމެ ފަހުގެ އަދާހަމަތަކަށް ބަލާއިރު އެ ގައުމުން މިހާރު ފެންނަ ކޮވިޑް ކޭސްތަކުގެ 6 އިންސައްތައަކީ ޑެލްޓާ ޕްލަސް ވޭރިއަންޓާ ގުޅުންހުރި ކޭސްތަކެއް ކަމަށް އެ އިދާރާއިން ވަނީ ހާމަކޮށްފައެެވެ.
ކޮވިޑް-19ގެ ވޭރިއަންޓުތަކަށް ޚާއްޞަ ވެކްސިނެއް ނެތްއިރު، މިހާރު ތިބި ވެކްސިންތައް ހުރިހާ ވޭރިއަންޓަކާ ދެކޮޅަށް ރަނގަޅަށް މަސައްކަތް ކުރާ ކަމަށް ސައިންސްވެރިން ވަނީ ބުނެފައެވެ. އަދި ގިނަ ގައުމުތަކުގައި ބޫސްޓަރ ޑޯޒް ދޭން ފެށުމާއެކު މި ވައިރަހާ ދެކޮޅަށް ފުރިހަމަ ރައްކާތެރިކަން ލިބިގެންދާނެކަމަށް ބައެއް ތަޖުރިބާކާރުން ލަފާކުރެއެވެ.
ދިވެހިރާއްޖޭގައިވެސް ކޮވިޑް ވެކްސިންގެ ބޫސްޓަރ ޑޯޒް ދޭން ފަށާފައިވާއިރު، އައްޑޫ ސިޓީގެ އަވަށްތަކުންވެސް ޝަރުތު ހަމަވާ ފަރާތްތަކަށް ބޫސްޓަރ ޑޯޒް ޖެހޭނެއެވެ.