އެންމެ ރަނގަޅީ 2 ޑޯޒްވެސް ޖެހި ބްރޭންޑުގެ 3 ވަނަ ޑޯޒް ޖެހުންކަމަށް ޑރ.ފައުޗީ ވިދާޅުވެއްޖެއެވެ.
ކޮވިޑް-19 އާ ގުޅޭ ކަންކަމުގައި އެންމެ އިސްކޮށް ހަރަކާތްތެރިވާ ޑރ.ފައުޗީ ވިދާޅުވީ، 3 ވަނަ ޑޯޒް ތަފާތު ބްރޭންޑަކުން ޖެހިޔަސް މައްސަލައެއް ނެތް ކަމަށާއި ނަމަވެސް އެންމެ އެދެވިގެންވަނީ ފުރަތަމަ 2 ޑޯޒްވެސް ޖެހި ބްރޭންޑުން ޖެހުން ކަމަށެވެ.
ފައުޗީ މިހެން ވިދާޅުވެފައިވަނީ އެމެރިކާގައި 3 ވަނަ ޑޯޒް ޖެހުމުގެ ކަންތައްތައް ކުރިއަށްދާ ދަނޑިވަޅެއްގައެވެ.
އެމެރިކާގެ ސާޖަން ޖެނެރަލް ވިވޭކްވެސް ވަނީ މި މޭރުމަކުން ވާހަކަފުޅު ދައްކަވާފައެވެ.
"ފުރަތަމަ 2 ޑޯޒަކަށް ޖެހީ ފާއިޒާ ނުވަތަ މޮޑާނާ ނަމަ، 3 ވަނަ ޑޯޒްވެސް ޖެހުން ބުއްދިވެރީ ހަމަ އެ ބްރޭންޑަކުން" ވިވޭކް ވިދާޅުވިއެވެ.
ދިވެހިރާއްޖޭގައި ބޫސްޓަރ ޝޮޓް (3 ވަނަ ޑޯޒް) ދިނުން ފަށާފައިވާއިރު، ރާއްޖޭގައި ދެމުން އަންނަނީ ފާއިޒާ ވެކްސިނެވެ.