ދެކުނު އެފްރިކާއިން ފެނިފައިވާ އުޅޭ ކޮވިޑް-19ގެ އާ ވޭރިއަންޓް އޮމިކްރޮން ފެތުރިދާނެތީ، އެ ވޭރިއަންޓް ފެތުރޭ ގައުމުތަކުން ލަންކާއަށް އެތެރެވުން މަނާކޮށްފިއެވެ.
ސްރީލަންކާގެ ސިއްހީ ވުޒާރާއިން ނެރެފައިވާ އެންގުމެއްގައިވާ ގޮތުން، ދެކުނު އެފްރިކާ، ބޮޓްސްވާނާ، ޒިމްބާބުވޭ، ނަމީބިއާ، ލެސޯޓޯ އަދި އެސްވާޓިނީގެ މީހުން މާދަމާއިން ފެށިގެން ލަންކާއަށް އެތެރެވުން މަނާވާނެކަމަށެވެ. އަދި މިއިން ގައުމެއްގެ ބަޔަކު ލަންކާއަށް ދަތުރުކުރާނަމަ، 14 ދުވަހުގެ ކަރަންޓީނެއް ފުރިހަމަކުރަން ޖެހޭނެކަމަށް އެ ވުޒާރާއިން ވަނީ ބުނެފައެވެ.
ދެކުނު އެފްރިކާއިން ފެނިގެން އުޅޭ އޮމިކްރޮން ވޭރިއަންޓާ ގުޅިގެން ދުނިޔޭގެ ގިނަ ގައުމުތަކުގެ ބޯޑަރު އަނެއްކާވެސް ބަންދުކުރަން ވަނީ ފަށާފައެވެ. ރާއްޖެއިންވެސް ވަނީ މި ވޭރިއެންޓާ ގުޅިގެން އަޅާނެ ފިޔަވަޅުތަކާމެދު މިއަދު މަޝްވަރާ ކުރުމަށް ނިންމާފައެވެ.
ޑަބްލިއު.އެޗް.އޯ.އިން ވަނީ މި ވޭރިއަންޓާ ގުޅިގެން މީގެ ނުރައްކާތެރިކަން ހާމަކޮށް އިންޒާރެއްވެސް ނެރެފައެވެ. އެގޮތުން މިއީ ފަސޭހައިން އެކަކުގެ ގައިން އަނެކަކުގެ ގަޔަށް ފެތުރެމުންދާ ވޭރިއަންޓެއް ކަމަށް ޑަބްލިއުއެޗްއޯ އިން ބުނެ އެވެ. ޑަބްލިއުއެޗްއޯ އިން ވަނީ މިހާރު އުފައްދާފައިވާ ކޮވިޑް ވެކްސިންތަކަށް މި ވޭރިއަންޓް ގުޑާނެކަން ކަށަވަރު ކުރުމަށް އަދި އިތުރު ދުވަސްތަކެއް ބޭނުންވާ ކަމަށް ބުނެފަ އެވެ.