މީދޫ ކޯގަންނު ގަބުރުސްތާނުގައި ހުރި މަހާނަގާތަކަށް ބަޔަކު ގެއްލުން ދީފިއެވެ.
މައުލޫމާތު ލިބިފައިވާ ގޮތުގައި މި މަހާނަގާތަކަށް ގެއްލުން ދީފައިވަނީ ރޭގަނޑުގެ ވަގުތެއްގައެވެ.
"އައްޑޫލައިވް"އިން ކުރި ސުވާލަކަށް ޖަވާބު ދެއްވަމުން އައްޑޫ މީދޫ އަވަށުގެ ކައުންސިލަރު އާމިނަތު ޞާލިޙާ ވިދާޅުވީ، މި މައްސަލަ މިހާރު ފުލުހުންނަށް ހުށަހަޅާފައިވާނެ ކަމަށާއި، ގަބުރުސްތާނުގެ ސެކިއުރިޓީ ބެލެހެއްޓުމުގައި އެހީތެރިކަމާއި އެއްބާރުލުން ދިނުމަށް ފުލުހުންނަށް އެދިފައިވާނެ ކަމަށެވެ. މީގެ އިތުރުން ސާލިހާ ވިދާޅުވީ، ގަބުރުސްތާނުގައި ރޭގަނޑު އެއްވެސް އައްޔެއް ނެތުމުން އެތަނުގެ ސެކިއުރިޓީ ބަލަހައްޓަން އުނދަގޫވާނެކަމަށް ގަބޫލުކުރައްވާ ކަމަށާއި، އެކަމަށް ހައްލެއް ގެނައުމަށް މިހާރު މަސައްކަތް ފަށާފައިވާނެކަމަށެވެ.
އެގޮތުން، ކޯގަންނުގައި ލައިޓް ހަރުކުރުމަށް މިހާރު ކޯޓޭޝަން ހޯދާފައިވާނެކަމަށާއި، މާދަމާ އެ ލައިޓުތައް ހަރުކުރެވޭނެކަމަށް ސާލިހާ ވިދާޅުވިއެވެ. ހަމައެހެންމެ، ދޮޅިދާންގެއަށް ގެއްލުންދިނުމާއި މަހާނަގާތައް ގެއްލުން ދިނުމާ ގުޅުންހުރި ކަމަށް ބެލެވޭކަމަށް ސާލިހާ ވަނީ ފާހަގަކުރައްވާފައެވެ. އަދި މި މައްސަލަތައް ތަކުރާރު ނުވާނެހެން ކުރިއަށް އޮތް އަހަރުގެ ބަޖެޓުގައި ހިމަނައިގެން ކެމެރާ ހަރުކުރުމުގެ ވާހަކަ މިނިސްޓްރީއާއެކު ދެކެވިފައިވާކަމަށް ސާލިހާ ވަނީ ވިދާޅުވެފައެވެ.
ޞާލިހާވަނީ މިފަދަ ތަންތަނަށް ގެއްލުން ނުދިނުމަށް އެދި އިލްތިމާސްކޮށްފައެވެ. އަދި ސެކިއުރިޓީ، ނުވަތަ ކައުންސިލަރަށް ނުވަތަ އާންމު ފަރުދަކަށް ޖެއްސުން ކުރުމަށް މިފަދަ ކަންކަން ނުކުރަން ސާލިހާ ވަނީ އެދިފައެވެ.
މީދޫ ކޯގަންނު ގަބުރުސްތާނަކީ ރާއްޖޭގައި ހުރި އެންމެ އާސާރީ ގަބުރުސްތާނެވެ. މިތަނަށް 900 އަށްވުރެ ގިނަ އަހަރުވެފައިވާއިރު، އާންމުންގެ ބަޔަކު ވަނީ މީގެ ކުރިންވެސް އެތަނުގައި ތިބި މަހާނަގާތައް ހަލާކުކޮށް ވަރަށް ބޮޑަށް ގެއްލުން ދީފައެވެ.