އައްޑޫ ސިޓީ ހިތަދޫ މޫދަށް ވެއްޓުނު އެކްސްކެވޭޓަރަކުން ތެޔޮ ލީކުވެ، މަސްތައް މަރުވި މައްސަލައެއް ބަލަމުން އަންނަ ކަމަށް އެންވަޔަރޮމެންޓް ޕްރޮޓެކްޝަން އޭޖެންސީ، (އީޕީއޭ)އިން ބުނެފިއެވެ.
މޫދަށް ވެއްޓުނު އެކްސްކެވޭޓަރު ދެ ހަފްތާފަހުން އެތަނުން ނަގާފައިވާއިރު، އެއީ އިންޑިއާ ކުންފުންޏެއްގެ އެކްސްކެވޭޓަރު ކަމަށް މައުލޫމާތުލިބެއެވެ. އަދި އެ ކުންފުނިން އެސަރަހައްދުގައި ހަރަކާތްތެރިވަމުން އަދި މަސައްކަތް ކުރަމުން އައިސްފައިވަނީ ކައުންސިލްގެ ހުއްދައާ އެކުކަމަށްވެސް މައުލޫމާތު ލިބެއެވެ.
އީޕީއޭގެ ޑިރެކްޓަރ ޖެނެރަލް އިބްރާހީމް ނައީމް ވިދާޅުވީ، މި މައްސަލަ އެއްވެސް ބަޔަކު ޖައްސާފައިނުވާ ކަމަށާއި ނަމަވެސް އީޕީއޭގެ ސަމާލުކަމަށް އައުމުން މި މައްސަލަ ބަލަން ފަށާފައިވާކަމަށެވެ.
މީސް މީޑިއާގައި ހިތަދޫ މީހަކު ހިއްސާކޮށްފައިވާ ވީޑިއޯއަކުން ފެންނަ ގޮތުގައި ގިނަ މަސްތައް މޫދަށް ލައްގާފައިވެއެވެ. މިކަމުގެ ސަބަބުން ގިނަ ބަޔަކު އަންނަނީ ނުރުހުން ފާޅުކުރަމުންނެވެ.