އައްޑޫ ސިޓީ މީދޫ އެކުވެރިންގެ ޗޭނު ޖަމްޢިއްޔާއިން ކޮންމެ އަހަރަކު ބާއްވަން ހަމަޖެހިފައިވާ ނެޓްބޯޅަ މުބާރާތް މިއަހަރުވެސް އޮންނާނެކަމަށް އެ ޖަމްޢިއްޔާއިން ބުނެފިއެވެ.
މި އަހަރުގެ މުބާރާތް ކުރިއަށް ގެންދަން ހަމަޖެހިފައިވަނީ ނެޓްބޯޅަ އެސޯސިއޭޝަނާއި ޗޭނު ޖަމްޢިއްޔާ ގުޅިގެންނެވެ.
މީދޫ ޗޭނު ޖަމްޢިއްޔާއިން ބުނެފައިވާ ގޮތުގައި ހުޅުދޫ-މީދޫގައި ތިބި މުއައްސަސާތަކަށް މި މުބާރާތުގައި ބައިވެރިވެވޭނެއެވެ. އަދި މިއަހަރުގެ މުބާރާތުގައި ބައިވެރިވާން ބޭނުން ފަރާތްތަކުން އެ ޖަމްޢިއްޔާއާ ކޮންޓެކްޓް ކުރެއްވުމަށްވެސް ވަނީ އެދިފައެވެ.
މިދިޔަ އަހަރުގެ މުބާރާތުގައި ޖުމުލަ 9 ޓީމުން ބައިވެރިވިއިރު، ސިޓީއިން ބޭރުގެ ގިނަ ކުޅުންތެރިންވެސް ވަނީ ބައިވެރިވެފައެވެ. ފާއިތުވެދިޔަ އަހަރު މުބާރާތުގެ ޗެމްޕިއަނުންނަށް 5000 ރުފިޔާ ދީފައިވާއިރު، މި މުބާރާތަކީ ހުޅުދޫ-މީދޫގައި ބޭއްވޭ އެންމެ ބޮޑު ނެޓްބޯޅަ މުބާރާތްކަންވެސް ފާހަގަކޮށްލެވެއެވެ.