215 ކިލޯގެ ޑްރަގްސްއާއެކު ހައްޔަރުކުރި ދެ މީހުންނަށް ފުލުހުން އަނިޔާކުރިކަމަށް ކޯޓުގައި ތުހުމަތުކޮށްފިއެވެ.
215 ކިލޯ މަސްތުވާތަކެއްޗާއެކު ހައްޔަރު ކޮށްފައިވަނީ ރ. މަޑުއްވަރި، ފިނިފަރު، ޢަލީ ޝާކިރު (42އ) އާއި ރ. މަޑުއްވަރި، ފެހިއަލި، ނިމާލް ޢަބްދުލްޙާރިޘް (33އ) އެވެ.
މި ދެމީހުންގެ ބަންދާމެދު ގޮތެއް ނިންމުމަށް އިއްޔަ ކްރިމިނަލް ކޯޓަށް ގެންދިއުމުން، މައްސަލަ ތަހުގީގު ކުރާ އައިއޯ ކޯޓުގައި ބުނެފައިވަނީ، އިންޓެލިޖެންސް ރިޕޯޓުން މި ދެމީހުން އިތުރު ބަޔަކާ ގުޅިގެން މަސްތުވާތަކެތި އެތެރެކުރަން އުޅޭކަމަށް މައުލޫމާތު ލިބިފައިވާކަމަށާއި، އެގޮތުން "ފެށުން 2" ނަމަކަށް ކިޔާ ލޯންޗެއްގައި މިދެމީހުން ރ. މަޑުއްވަރިއަށް ވަތް ވަގުތު ހުއްޓުވާ ބަލައިފާސްކުރި ކުރުމުން ލޯންޗުން ސެޓެލައިޓް ފޯނަކާއި ގިނަ އަދަދެއްގެ ޕެޓްރޯލް ހަންތައް ފެނިފައިވާކަމަށެވެ. އަދި ދެމީހުންގެ ހަށިގަނޑުގެ އެކި ތަންތަނުން ވެލީގެ އަސަރު ފެނިފައިވާކަމަށާއި، އަދި ލޯންޗްގެ ގެގަނޑުގެ އަރިމަތިން ލޯންޗް އިތުރު ބޯޓަކާއި ގާތްކޮށްފައިވާކަމުގެ ނިޝާންތައް ފެނިފައިވާކަމަށްވެސް އައިއޯ ކޯޓުގައި ބުނެފައިވެއެވެ.
މީގެއިތުރުން މިސަރަަައްދުގައި ހުރި ފަޅުރަށްތައް ބަލަމުންދަނިކޮށް ރ. ބޮޑުފަރު ފިނޮޅުން ޕެޓްރޯލް ހުސްކުރި 20 ލީޓަރުގެ 63 ހަން ފެނިގެން ދެމީހުންނާ ސުވާލުކުރުމުން އެއީ އެމީހުން މަސްތުވާތަކެތި ބަލާދިއުމަށްޓަކައި ޓެސްޓް ދަތުރެއް ކުރަން ބޭނުންކުރި ޕެޓްރޯލް ހުސްކުރި ހަންތަކެއްކަމަށް ބުނެފައިވާކަމަށާއި، އަދި މިދެމީހުން އެތެރެކުރި މަސްތުވާތަކެތި ރ. ރާނބުގަލީގައި ހުންނާނެކަމަށް ބުނެ އެތަކެތި ދައްކާފައިވާކަމަށް އައިއޯ ބުނެފައިވެއެވެ.
މައްސަލަ ތަހުގީގުކުރާ އައިއޯ ބުނެފައިވަނީ، ފުލުހުން ރ. ރާނބުގަލި ބަލައިފާސްކުރުމުން ތުހުމަތުކުރެވޭ ދެމީހުން މަސްތުވާތަކެތި ހުންނާނެކަމަށް ބުނި ކަށިކެޔޮގަހުގެ ތެރެއިން 11 ގޯނި ފެނިގެން ނަގާ އެ ގޯނިތައް ބަލައިފާސްކުރިކުރުމުން ޖުމުލަ، މަސްތުވާތަކެތި ކަމަށް ޝައްކުކުރެވޭ އެއްޗެއްހުރި، 215 ކަރުދާސްކޮތަޅު ހުރިކަމަށެވެ. އަދި އެތަކެތީގެ ވަގުތީ ބަރުދަނުގައި 215 ކިލޯ ހުރި ކަމަށެވެ.
އައިއޯ ބުނެފައިވަނީ މި ދެމީހުންވެސް ކުދަކަމުދާތަކެތި ދިނުމަށް އިންކާރު ކުރިކަމަށާއި، ލޯންޗުން ފެނުނު ސެޓެލައިޓު ފޯނުގެ އެކްސްޓްރެކްޝަން ރިޕޯޓަށް ބެލުމުން މި ފޯނުގައި ހުރި މެސެޖުތަކުގައި މިމީހުން ރާއްޖެ ސަރަހައްދުން ބޭރަށް ދިޔަކަމުގެ މެސެޖުތަކަކާއި ބޯޓަކާއި ބައްދަލުކުރިކަމުގެ މެސެޖުތަކެއް ފެނިފައިވާކަމަށެވެ.
މިމައްސަލައިގައި ފުލުހުން އެދިފައިވަނީ މި ދެމީހުން ޝަރީއަތް ނިމެންދެން ބަންދުގައި ބޭތިއްބުމަށެވެ.
މި މައްސަލައިގައި ހައްޔަރު ކޮށްފައިވާ ދެމީހުންގެ ދިފާއީ ވަކީލް ކޯޓުގައި ވާހަކަ ދައްކަވަމުން ބުނެފައިވަނީ، ޕެޓްރޯލް ހުސްކުރި ހަންތަކާއި ގުޅޭގޮތުން ތުހުމަތުކުރެވޭ ފަރާތުން ދެއްކި ކަމަށް ބުނާ ވާހަކަތަކާއި މަސްތުވާތަކެތި ހުރިތަން ދެއްކިކަމަށް ބުނެ ފުލުހުން ދައްކާފައިވާ ވާހަކަތަކަކީ އެއްވެސް އަސްލެއް ނެތް ވާހަކަތަކެއް ކަމަށާއި، އެފަދަ އެއްވެސް ވާހަކަ އެއް އެދެމީހުން ދައްކާފައި ނުވާކަމަށެވެ.
މީގެއިތުރުން ވަކީލް ވަނީ އެދެމީހުންނަށް ފުލުހުން އަނިޔާކުރި ކަމަށްވެސް ކޯޓުގައި ބުނެފައެވެ.
ހައްޔަރު ކުރި ދެމީހުންގެ ތެރެއިން އަލީ ޝާކިރު ކޯޓުގައި ވާހަކަ ދައްކަމުން ބުނެފައިވަނީ މިމައްސަލައިގައި އެންމެ ފުރަތަމަ ބަންދުގައި ބެހެއްޓުމަށް ކޯޓުން އަމުރުކުރިފަހުން، ފަޅު ރަަށަކަށް ގެންގޮސްފައިވާކަމަށާއި، އެރަށަށް ގެންގޮސް ވަރަށް ބޮޑަށް އަނިޔާކޮށްފައިވާކަމަށެވެ.
އެގޮތުން ފުރަތަމަވެސް ގެންދިޔަ ގޮތަށް ކަންފަތްމަތީގައި ޖަހާފައިވާކަމަށާއި، ޖެހުމުން ވަގުތުން ވެއްޓުނުކަމަށާއި ފުލުހުން ޕެޕަރ ސްޕްރޭ ޖަހައި އަތުންނާއި ފައިން ގައިގައި ތަޅައި އަނިޔާކޮށްފައިވާކަމަށެވެ. އަދި އަނިޔާކުރުމުގެ ސަބަބުން ހެއަށް ގޮތްވެ ވާނުވާ ނޭންގޭ ފަހަރުވެސް ދިޔަކަމަށެވެ. އަދި އިރުއޮއްސުނުއިރު ރަށަށް ގެންދިޔަ ގޮތަށް ގާތްގަނޑަކަށް ފަތިސް ވަންދެން އަނިޔާކުރިކަމަށާއި، އަނިޔާކުރުމުގެ ސަބަބުން އަނިޔާއިން ސަލާމަތްވާންވެގެން، ހަންތަކާއި ގުޅޭގޮތުން ކޮންމެވެސް އެއްޗެއް ބުނެފައިވެދާނެކަމަށާއި، ނަމަވެސް މަސްތުވާތަކެއްޗާއި ގުޅޭގޮތުން އެއްވެސް އެއްޗެއް ބުނެފައި ނުވާނެކަމަށެވެ.
އަދިވެސް ބުނެފައިވަނީ އޭނާގެ އަރިކަށިގައި ވަރަށް ރިއްސާކަމަށާއި، އަމިއްލަ ހާލައިގެން އުޅެން އުނދަގޫކަމަށާއި، ވަކި ފަޅިއަކަށް އޮށޯވެވެސް ނޯވެވޭކަމަށެވެ. އަދި ފުލުހުންގެ ފަރާތުން އަނިޔާކުރަނީ ވަރަށް "ސްމާޓްކޮށް" ކަމަށާއި، އެތެރެ ހައްޓަށް ވެފައިވާ އަނިޔާތައް ބޭރަށް ފެންނަން ނުހުންނާނެކަމަށެވެ.
އަނިޔާކުރިކަމަށް ބުނެފައިވާ ވާހަކަތަކަށް ފުލުހުން އިންކާރު ކޮށްފައިވާއިރު، އެފަދަ އަނިޔާތަކެއް މިހާރުވެސް ފެންނަން ނެތްކަމަށް ފުލުހުން ބުނެފައިވެއެވެ. އަދި މެޑިކަލް ލީގަލް ރިޕޯޓެއް ހައްދާފައިވާކަމަށާއި، އެފަދަ އަނިޔާއެއް ފެންނަން ނެތްކަމަށް ވެސް ފުލުހުން ބުނެފައިވެއެވެ.
މިމައްސަލައިގައި ބަންދު މަޖިލީހުގައި އިންނެވި ގާޒީ އާދަމް މުހައްމަދު ވަނީ އަލީ ޝާކިރަށް ފުލުހުންގެ ފަރާތުން ބޮޑެތި އަނިޔާތަކެއް ކޮށްފައިވާކަމަށް ފާހަގަކޮށްފައިވާތީ އެކަން މޯލްޑިވްސް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)ގެ ސަމާލުކަމަށް ގެނެސް، މިކަން ހިނގާފައިވާ ގޮތެއް ބެލުމަށްފަހު ކޯޓަށް ހިއްސާކުރުމަށް އަންގާފައެވެ. އަދި އެ ދެމީހުންގެ ބަންދަށް ކޯޓުން ވަނީ 15 ދުވަސް ދީފައެވެ.