ސ. ހުޅުމީދޫގައި ތިބި ނުކުޅެދުންތެރިކަން ހުންނަ ކުދިންނަށް އެހީވާން ފަންޑް ރައިޒިން ޕްރޮގްރާމްތަކެއް ފަށައިފި އެވެ.
މި ޕްރޮގްރާމް ކުރިއަށް ގެންދަނީ މުލިމަތި ޔުނައިޓެޑް ޖަމިއްޔާ އާއި ޗޭނު ޖަމިއްޔާގެ އިތުރުން ސ. އަތޮޅު މަދަރުސާގެ ދަރިވަރުންތަކެއް ބައިވެރިވެގެންނެވެ.
މުލިމަތި ޖަމިއްޔާގެ ޗެއާޕާސަން އަބްދުﷲ ވަސީމް މިއަދު ވިދާޅުވީ އެ ރަށުގައި ހުޅުމީދޫގައި ނުކުޅެދުންތެރިކަން ހުންނަ 60 ވަރަކަށް ކުދިން އެބަ ތިބި ކަމަށެވެ.
އެހެންވެ މާލީ ގޮތުން އެ ފަރާތްތަކަށް އެހީތެރިކަމެއް ފޯރުކޮށް ދިނުމުގެ ގޮތުން ހިންގާ އިވެންޓްތަކުގެ ދަށުން މިއަދު ހަވީރު ވަނީ ފުޓްބޯޅަ މެޗެއް ވެސް ކުޅެފަ އެވެ. މި މެޗް ކުޅުނީ ސ. އަތޮޅު މަދަރުސާގެ ދަރިވަރުންތަކަކާއި މުލިމަތިގެ ޓީމެއްގެ މެދުގަ އެވެ.
ވަސީމް ވިދާޅުވީ ފަންޑް ރައިޒް ކުރަން މާދަމާ ހަވީރު، ހާއްސަ ކުޑަ ކުދިންގެ ހަވީރެއް ވެސް ބާއްވަން ހަމަޖެހިފަައިވާ ކަމަށެވެ.
އެ އިވެންޓް ނިންމުމަށް ފަހު، ލިބުނު ފައިސާ ނުކުޅެދުންތެރިކަން ހުންނަ ހުރިހާ ކުދިންގެ މެދުގައި ހަމަހަމައަށް ބެހުމަށް ވަނީ ނިންމައިފަ އެވެ.
ވަސީމް ވިދާޅުވީ މިހާތަނަށް ހިންގި ހަރަކާތްތަކުން 17،000ރ. ލިބިފައިވާ ކަމަށެވެ. އަދި މާދަމާ ކުޑަ ކުދިންގެ ހަވީރު ނިންމާލާ އިރު އެ އަދަދު 25،000ރ. އަށް އަރާނެ ކަމަށް ލަފާ ކުރެވޭ ކަމަށް އޭނާ ވިދާޅުވި އެވެ.
ނުކުޅެދުންތެރިކަން ހުންނަ ކުދިންނަށް އެހީވާން މިފަދަ ހަރަކާތެއް ހިންގަމުން އަންނަ އިރު، ވާހަކަ ދެއްކުމާއި އަޑު އިވުމުން މަހުރޫމްވެފައިވާ ކުދިންނާ މުއާމަލާތް ކުރާނެ ގޮތް ދަސްކޮށްދޭ ކޯހެއް ވެސް ހުޅުމީދޫގައި އަންނަނީ ހިންގަމުންނެވެ.
ނުކުޅެދުންތެރިކަން ހުންނަ ޒުވާނެއް ކަމަށްވާ މުހައްމަދު އަފްވާމް ކިޔަވައިވޭ މި ކޯހުގައި 25 ޒުވާނަކު ބައިވެރިވެފައިވެ އެވެ.
ވަސީމް ވިދާޅުވީ ފަންޑް ރައިޒް ކުރަން ހިންގާ ހަރަކާތްތަކަށް އަފްވާމާއި ކޯހުގެ ބައިވެރިންގެ ފަރާތުން ވެސް ވަރަށް ބޮޑު އެހީތެރިކަމަކާއި އެއްބާރުލުމެއް ލިބެމުން އަންނަ ކަމަށެވެ.