ރައްޔިތުންނަށް ހިދުމަތް ދިނުމުގައި ވަކި ޕާޓީއެއްގެ، ވަކި ކުލައެއްްގެ މީހެއް ތަފާތު ކުރުމެއް ނެތި ހުރިހާ ރައްޔިތުންނަށް ވެސް ހަމަހަމަކޮށް ހިދުމަތްކޮށް ދެއްވާނެ ކަމަށް ކުރިއަށް އޮތް އައްޑޫ ސިޓީ ކައުންސިލް އިންތިހާބަށް އެެމްޑީޕީ ޓިކެޓްގައި ވާދަ ކުރައްވާ އަލީ މުހައްމަދު (އައްދު) ވިދާޅުވެއްޖެ އެވެ.
ކުރީގެ ރައީސް މުހައްމަދު ނަޝީދާ އެކު ރޭ ހުޅުމީދޫގައި ބޭއްވި އައްދުގެ ކެމްޕޭން ޖަލްސާގައި އޭނާ ވިދާޅުވީ، ހުޅުމީދޫ އަވަށު ބޯޑްގެ ނައިބް ރައީސަކަށް ހުންނަވައިގެން ވެސް ފާއިތުވި ދެ އަހަރު އޭނާ މަސައްކަތް ކުރެއްވި ހުރިހާ ރައްޔިތުންނަށް އެއް ހަމައަކުން ހިދުމަތް ދޭން ކަމަށެވެ.
އަދި ކުރިއަށް އޮތް ތަނުގައި ވެސް މަސައްކަތް ކުރާނީ އެގޮތަށް ކަމަށާއި ދެމިހުންނަވާނީ ހަމަ އެ އުސޫލްގެ މަތީގައި ކަމަށް ވިދާޅުވި އެވެ.
ކުރިން ސިފައިންގެ ތެރޭގައި ވެސް މަސައްކަތް ކުރެއްވި އައްދު ވިދާޅުވީ އޭނާ ބޭނުން ވަނީ ކައުންސިލަށް މެމްބަރެއްގެ ގޮތުގައި ހުޅުމީދު އަށް ތަރައްގީ އާއި ކުރިއެރުން ހޯދައި ދެއްވަން ކަމަށެވެ.
އަދި އޭނާ އަބަދު ވެސް މަސައްކަތް ކުރައްވާނީ ރައްޔިތުންނާ ގުޅިގެން، ރައްޔިތުންގެ ހިޔާލާއި މަޝްވަރާ ހޯއްދަވައިގެން ކަމަށް ވެސް ވިދާޅުވި އެވެ.
އެހެންވެ އެ ފުރުސަތު އޭނާ އަށް ދެއްވުމަށް، ރައްޔިތުންގެ ކިބައިން އައްދު ވަނީ އެދިވަޑައިގެންފަ އެވެ.