ފަގީރު ހާލަތުގައި ދިރިއުޅޭ ފަރާތްތަކަށް ފެނާއި ނަރުދަމާގެ ޚިދުމަތުގެ ބިލު ދެއްކުމަށް އަންނަ އަހަރުން ފެށިގެން މާލީ އެހީ ދިނުމަށް ސަރުކާރުން ނިންމައި އެކަމަށް ބޭނުންވާ ފައިސާ އަންނަ އަހަރަށް ލަފާ ކުރާ ދައުލަތުގެ ބަޖެޓްގައި ހިމަނައިފި އެވެ.
އަންނަ އަހަރަށް ލަފާކުރާ ބަޖެޓްގައި އެކަމަށްޓަކައި ދެ މިލިއަން ރުފިޔާ ހިމަނާފައިވެ އެވެ. ސަރުކާރުގެ ސްޓްރެޓީޖިކް އެކްޝަން ޕްލޭނުގައި ހިމެނޭ މި ޕްރޮގްރާމްގެ ސަބަބުން އެފަދަ ގޭބިސީތަކުގެ މެންބަރުންނަށް އަސާސީ ޚިދުމަތެއް ކަމުގައިވާ ފެނާއި
ނަރުދަމާގެ ޚިދުމަތް ޚިދުމަތް ހޯދުމަށް ފައިސާ ދެއްކުމުގައި މިހާރު ދިމާވާ ދަތިތަކަށް އެކަށީގެންވާ ހައްލެއް ލިބިގެން ދާނެ ކަމަށް ބަޖެޓްގައި ފާހަގަކޮށްފައިވެ އެވެ.
މި ބަޖެޓްގައި އަންނަ އަހަރު އަތޮޅުތެރޭގައި ޖޮބް ސެންޓަރުތައް ގާއިމުކުރުމަށް ހިމަނައިފައިވާ ދެ މިލިއަން ރުފިޔާގެ ޕްރޮގްރާމް ހިމެނެ އެވެ. އަދި ނުކުޅެދުންތެރިކަން ހުންނަ މީހުންނަށް ރިހެބިލިޓޭޝަން ޚިދުމަތް ދޭ މަރުކަޒުތަކާއި ޑޮމެސްޓިކް ވައިލެންސް ޝެލްޓަރ ހިންގުމަށް ހިމަނާފައިވާ 2.9 މިލިއަން ރުފިޔާގެ ޕްރޮގްރާމް ފާހަގަކޮށްލެވެ އެވެ. އޭގެ އިތުރުން މަސްތުވާތަކެއްޗަށް ދެވިހިފާފައިވާ ފަރާތްތަކަށް އަމާޒުކޮށްގެން ހިންގާ ޖުމުލަ 3.5 މިލިއަން ރުފިޔާގެ ދެ ޕްރޮގްރާމްކަމުގައިވާ ކޮމިއުނިޓީ ބޭސްޑް ޑްރަގް ރިހެބިލިޓޭޝަން ޕްރޮގްރާމާއި ކޮމިއުނިޓީ އީ-އިންޓެގްރޭޝަން ޕްރޮގްރާމް ހިމެނެ އެވެ. އަދި ރައްކާތެރިކަމާއެކު ކުނި ނައްތާލުމަށް އަމާޒުކޮށްގެން ހިންގުމަށް ބަޖެޓުކޮށްފައިވާ ޖުމުލަ 3.8 މިލިއަން ރުފިޔާގެ ޕްރޮގްރާމްތައް ހިމެނެއެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ސަރުކާރުން ހުށައަޅާފައިވަނީ 36.9 ބިލިއަން ރުފިޔާގެ ބަޖެޓެކެވެ.