ހުޅުމާލޭގައި އަލަށް 4 އިތުރު ހަތަރު ސްކޫލް އެޅުމަށް އަންނަ އަހަރުގެ ބަޖެޓްގައި ހިމަނައިފި އެވެ.
އަންނަ އަހަރަށް ލަފާ ކުރާ ދައުލަތުގެ ބަޖެޓްގައި މި ފަސް ސްކޫލަށްވެސް ބޭނުންވާ ފައިސާ ވަނީ ހިމަނާފަ އެވެ. އޭގެ ތެރެއިން 3 ސްކޫލަކަށް 5،5 މިލިއަން ހިމަނާފައިވާއިރު އެއް ސްކޫލަކަށް ތިން މިލިއަން ހިމަނާފައިވެ އެވެ.
ސަރުކާރުން އަލަށް ސްކޫލް އިމާރާތް ކުރަނީ ކޮންތަނެއްގައި ކަމެއް އަދި ހާމައެއް ނުކުރެ އެވެ. އެހެން ނަމަވެސް ހުޅުމާލޭ ދެ ވަނަ ފިޔަވަހީގައި މިހާރު މީހުން ދިރިއުޅެން ފަށާފައިވާތީ އާ ސްކޫލްތައް އަޅާނީ އެތަނުގައިކަމަށް ބެލެވެ އެވެ.
ތައުލީމީ ޚިދުމަތްތަކާއި ކުރިއެރުވުމަށް ހިންގޭ ޕްރޮގްރާމްތަކާއި މަޝްރޫއުތަކަށް ބަޖެޓުގައި 4,067 މިލިއަން ހިމަނާފައިވެ އެވެ. އޭގެ ތެރޭގައި އަތޮޅު ތެރޭގެ ގިނަ ސްކޫލްތަކަށް ކްލާސްރޫމްތައް އިތުރުކުރުމަށް އަޅާ އިމާރާތްތަކަށް މި ބަޖެޓްގައި ފައިސާ ކަނޑައަޅާފައިވެ އެވެ.
ތައުލީމީ ދާއިރާއަށް ކަނޑައަޅާފައިވާ ބަޖެޓްގެ ބޮޑު އިންސައްތައެއް ހާއްސަކޮށްފައި އޮތީ އަތޮޅުތެރޭގެ ސްކޫލްތަކުގެ ޖާގަ އިތުރުކުރުމަށް ހިންގާ މަޝްރޫއުތަކުގެ ޚަރަދުތަކަށާއި ޕްރައިމަރީ އަދި ސާނަވީ ތަޢުލީމުދޭ ސްކޫލުތައް ގާއިމުކޮށް މި ސްކޫލުތަކުގެ ފެންވަރު ރަނގަޅުކުރުމުގެ ގޮތުން ސްކޫލުތައް އިތުރަށް ތަރައްގީކުރުމަށް ކުރާ ޚަރަދާއި އިންސާނީ ވަސީލަތްތަކަށް ކުރާ
ޚަރަދަށެވެ.
ހަމައެހެންމެ، ސަރުކާރުން ހިންގާ ސްޓޫޑަންޓް ލޯން ސްކީމް އަދި އެހެނިހެން ސްކޮލަރޝިޕްތަކުގެ އިތުރުން ދިވެހި ވަރކްފޯސްގެ ސްކިލްސް އިތުރުކުރުމުގެ ގޮތުން ހިންގާ އެކި ހަރަކާތްތަކުގެ ޚަރަދުވެސް މި ބައިގައި ހިމަނައިފައިވެ އެވެ.