އިނގިރޭސިވިލާތުގެ ސްކޮޓްލެންޑުގައއި ކުރިއަށްދާ ކޮޕް26 ސަމިޓުގައި ބައިވެރިވާ ދިވެހި ވަފްދުގެ އެޑްވައިޒަރަކަށް އދ.ގެ ހިއުމަން ރައިޓްސް އޮފީހުގެ ކުރީގެ ހައިކޮމިޝަނަރު ޕްރިންސް ޒައިދު ރަޢަދުލްޙުސައިން ހަމަޖައްސައިފިއެވެ.
ރައީސް އޮފީހުން ހާމަކޮށްފައިވާ ގޮތުގައި ޒައިދު އަލް ރަޢަދަށް ދިވެހި ވަފްދުގެ އެޑްވައިޒަރުކަން ދެއްވީ ރައިސުލްޖުމްހޫރިއްޔާ އިބްރާހިމް މުޙައްމަދު ސޯލިހެވެ.
ޒައިދު ރަޢަދު މި މަގާމަށް ހަމަޖެއްސެވުން ވެގެންދާނީ ކްލައިމެޓް މަޝްވަރާތަކުގައި މުހިންމު އިސްތިރާޖީ ޕާޓްނަޝިޕަކަށް ކަމަށްވެސް ރައީސް އޮފީހުން ބުނެފައިވެއެވެ.
ކޮޕް26 ސަމިޓުގައި ދިވެހިރާއްޖޭގެ ވަފުދުގައި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ހިމެނިވަޑައިގަންނަވާއިރު، މި ވަފުދުގައި ދެން ތިއްބެވީ އެންވަޔަރޮމެންޓް އެންޑް ކްލައިމެޓް ޗޭންޖް މިނިސްޓަރ އާމިނަތު ޝައުނާއާއި ސްޕެޝަލް އެންވޯއި ފޮ ކްލައިމެޓް ޗޭންޖް ސަބްރާ އިބްރާހިމް ނޫރައްދީނެވެ.
ދިވެހި ވަފުދުގެ އެޑްވައިޒަރުގެ ގޮތުގައި ޒައިދު ރަޢަދު ހަމަޖައްސާފައިވާއިރު، ޒައިދަކީ އިންޓަނޭޝަލަން ޕީސް އިންސްޓިޓިއުޓްގެ ސީ.އީ.އޯއެވެ.