ހައްދުންމަތިން ފުރައިގެން ހުވަދުއަތޮޅު އުތުރުބުރިއަށް ދަތުރުކުރަމުން ދިޔަ އަލްމާ ބޯޓު ދިޔަވި ވާހަކައަކީ އެއްވެސް ހަޤީޤަތެއް އެކުލެވޭ ވާހަކައެއް ނޫންކަމަށް އެ ބޯޓުގެ ކައްޕި ބުނެފިއެވެ.
ގއ.އެކެފަރުގެ އުތުރުން 8 ނޯޓިކަލް މޭލު ބޭރުން ދަތުރުކުރަމުންދިޔަ މި ބޯޓު ދިޔަވިކަމަށް ދެކެވޭ ވާހަކަތަކާ ގުޅިގެން އެ ބޯޓުގެ ކައްޕި ބުނީ ދަތުރަށް ނުކުތީ މެޓް އޮފީހުގެ އިރުޝާދުގެ މަތިން ކަމަށެވެ. ނަމަވެސް ކަނޑަށް ނިކުމެވުނު ފަހުން މެޓުން އެލާޓު ނެރުނު ކަމަށާއި، 3 ގަޑިއިރުގެ ދަތުރު 7 ގަޑިއިރަށް ދިގުލައިގެން ދިއުމުން އެމް.އެން.ޑީ.އެފްގެ އެހީތެރިކަމަށް އެދުނު ކަމަށެވެ.
"[ބޯޓު ދިޔަވި] ވާހަކަ ކޯސްޓްގާޑާ ހިއްސާކުރީ ކޮންފަރާތަކުން ކަމެއް ނޭނގެ. ބޯޓަށްވެސް އަދި އޭގައިވާ މުދަލަކަށްވެސް ގެއްލުމެއް ނުވޭ" އަލްމާ ބޯޓުގެ ވެރިޔާ މޫސާ އަހުމަދު ދީދީ ބުންޏެވެ.
އަލްމާ ބޯޓު ގަދައިގައި ޖެހި ދަތުރުނުކުރެވުމުން ސިފައިންގެ އެހީތެރިކަމަށް އާދީއްތަ ދުވަހުގެ މެންދުރު 13:45 ހާއިރު އެދިފައިވާކަމަށާއި، ހަމަ އެރޭ 9:30 ހާއިރު ކޯސްޓްގާޑުގެ ބެލުމުގެ ދަށުން ސަލާމަތްތެރިކަމާއެކު ގއ.މާމެންދޫ ބަނދަރަށް ގެންދެވުނުކަމަށް އެމް.އެން.ޑީ.އެފުން ބުންޏެވެ.
މި ހާދިސާއާ ގުޅިގެން ބޯޓަށް އެއްވެސް ގެއްލުމެއް ލިބިފައިނުވިޔަސް، ގަދަވަޔާއެކު ދޮރެއް ލެއްޕުނު ގަޑީގައި މުވައްޒިފެއްގެ އިނގިލި ފިތިގެން ސީ އެމްބިއުލާންސުގައި އެމީހާ ވިލިނގިލީ ސިއްހީ މަރުކަޒަށް ވަނީ ގެންގޮސްފައެވެ.