ޓިކެޓް ނަގާފައި ފުރަން ނުގޮސްފިނަމަ، އެހެން ފްލައިޓަކަށް ބަދަލުކުރާނީ އިތުރު ފީއަކާއެކު ކަމަށް މޯލްޑިވިއަނުން ބުނެފިއެވެ.
މޯލްޑިވިއަންގެ ޕަބްލިކް ރިލޭޝަންސް ކޮމިއުނިކޭޝަން މެނޭޖަރ މޫސާ ވަސީމު ވިދާޅުވީ މިގޮތަށް ނިންމީ ޕީކް ދުވަސްވަރާ ދިމާކޮށް ކަމަށެވެ. އަދި މިއީ 'ނޯ ޝޯ' މަދުކުރުމަށް ގެނައި ބަދަލެއްކަމަށްވެސް މޫސާ ވަނީ ވިދާޅުވެފައެވެ.
މޯލްޑިވިއަންގައި މީގެ ކުރިން އަމަލުކުރަމުން އައި އުސޫލަކީ، ޓިކެޓް ނަގާފައި ފަސިންޖަރު ފުރަން ނުގޮސްފިނަމަ، އެހެން ފްލައިޓަކަށް އިތުރު ފީއަކާ ނުލައި ބަދަލުކުރެވޭ ގޮތެވެ. ނަމަވެސް މިހާރު ގެނެވުނު ބަދަލާއެކު 80 ރުފިޔާއާއި 200 ރުފިޔާއާ ދެމެދުގެ ފީއެއް ނެގުމަށް ވަނީ ހަމަޖެހިފައެވެ.
ފާއިތުވެދިޔަ 7 މަސްދުވަހުގެ ތެރޭގައި ޖުމުލަ 16،500 މީހުން ޓިކެޓް ނެގުމަށްފަހު ފުރާ ގަޑިއަށް ނާންނަކަމަށާއި އެއީ މަހެއްގެ މައްޗަށް އެވްރެޖްކޮށް 2300 މީހުންކަމަށްވެސް މޫސަ ވަނީ ވިދާޅުވެފައެވެ. އަދި މިގޮތަށް ކަންކުރުމުގެ ސަބަބުން ފުރަން ބޭނުންވެފައި ތިބޭ އެހެން މީހުންނަށް އެ ފުރުސަތު ހަނިވެގެންދާކަންވެސް މޫސަ ވަނީ ފާހަގަކުރައްވާފައެވެ.
މޯލްޑިވިއަންއަކީ ދިވެހިރާއްޖޭގެ ޤައުމީ އެއާލައިނެވެ. ރާއްޖޭގެ ހުރިހާ މަންޒިލަކަށް މޯލްޑިވިއަންގެ ދަތުރުތައް އޮންނައިރު، މޯލްޑިވިއަންގެ ވާދަވެރިންގެ ގޮތުގައި ތިބީ ފްލައިމީ އާއި މަންތާއެވެ.