މި މަހުގެ 18 ގައި އޮންނަ ލޯކަލް ކައުންސިލް އިންތިހާބުގައި އައްޑޫން ޕީޕީއެމަށް ވޯޓް ދޭނެ ބަޔަކު ނެތް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ކައުންސިލް އިންތިހާބުގައި އައްޑޫ ސިޓީ ކައުންސިލަށް އެމްޑީޕީ ޓިކެޓްގައި ވާދަކުރައްވާ ކެންޑިޑޭޓުންނަށް ކެމްޕޭން ކުރެއްވުމަށް ސ. ހިތަދޫގައި ބޭއްވި ޖަލްސާގައި ނަޝީދު ވިދާޅުވީ އައްޑޫގައި ޕީޕީއެމަށް ވޯޓް ދޭނެ ބަޔަކު ނެތް އިރު، އެ ޕާޓީ އަށް އަޣުލަބިއްޔަތު ދޭނެ ބަޔަކު ވެސް ނެތް ކަމަށެވެ.
ނަޝީދު އަދި ވިދާޅުވީ އައްޑޫ ސިޓީ ކައުންސިލް އިންތިހާބުގައި އެމްޑީޕީގެ ކެންޑިޑޭޓުންނާ ވާދަކުރައްވަން ޕީޕީއެމުން ނިކުންނަ އިރު، އެ ޕާޓީގައި ތިބީ އައްޑޫ މޭޔަރު އަބްދުﷲ ސޯދިގް (ސޯބެ) އަށް ފެބްރުއަރީ 8، 2012 ގައި ލާއިންސާނީ އަނިޔާތަކެއް ވެސް ކޮށްފައިވާ ބައެއް ކަމަށެވެ.
"މިއަދު ސިޓީ ކައުންސިލްގެ އިންތިހާބަށް ޕީޕީއެމުން ވާދަ ކުރައްވަން ނިކުންނަވާ އިރު، ތިޔަ ބޭފުޅުންގެ ހަނދާނަށް ގެންނަވާ ފެބްރުއަރީ 8، 2012 ވަނަ ދުވަސް. އެ ދުވަހު އެ ބޭފުޅުން މަސައްކަތްކުރެއްވީ ސިޓީ ކައުންސިލް އުވާލުމަށާއި އަދި ވަކިން ހާއްސަކޮށް އެ ދުވަހު މޭޔަރުގެ ގައިގައި އެ ބޭފުޅުން ތަޅައި އަނިޔާކުރީ ވަރަށް އިންސާނިއްޔަތާ ހިލާފު ގޮތަކަށް،" ފެބްރުއަރީ 7، 2012 ގައި މަގާމުން އިސްތިއުފާ ދެއްވި ނަޝީދު ވިދާޅުވި އެވެ.
"މިއަދު އެ ބޭފުޅުން ނިކުންނަވާ އެ އަނިޔާ އަށް ޖަވާބުދާރީވާ އެއްވެސް މީހަކު ނުހޯދައި، އެ ހިންގި ޖަރީމާ އަށް ކުޑަ ޝަރީއަތެއް ވެސް ތަހުގީގެއް ވެސް ނުހިންގަވައި އަނެއްކާ އަލުން އައްޑޫ ރައްޔިތުންގެ ކުރިމައްޗަށް ނިކުމެ ތިމަންނާމެންނަށް ވޯޓް ދެއްވާށޭ ވިދާޅުވާތީވޭ އަޅުގަނޑު ހަމަ އަޖައިބުވޭ،" ނަޝީދު ވިދާޅުވި އެވެ. "އެ ބޭފުޅުންނަކީ މި ސިޓީ ކައުންސިލް އުވާލުމަށާއި އަދި މި ސިޓީގެ މޭޔަރަށް އަނިޔާކޮށްފައި ތިބި ބައެއް. ބޮޑަށް ރަނގަޅީ އެ ބޭފުޅުން ދެން ގޮސް ތަހުގީގުކޮށް، ހައްގު އަދަބު ދިނުން،" ޕީޕީއެމަށާއި ރައީސް އަބްދުﷲ ޔާމީންގެ ސަރުކާރަށް ވަރަށް ބޮޑަށް ފާޑު ވިދާޅުވަމުން ނަޝީދު ވިދާޅުވި އެވެ. "އެ ބޭފުޅުން ކުރިމަތިލާންވީ މި އިންތިހާބުގެ ތެރެއަކަށް ނޫން. އަޅުގަނޑުމެންނަށް ކުރި އެ އަނިޔާގެ އިންސާފު އަބަދު ވެސް ބޭނުންވާނެ. އެ އިންސާފު އިރާދަކުރެއްވިއްޔާ އަޅުގަނޑުމެން ހޯދާނަން."
ސޯބެ އަށް ހަމަލާ ދިން މައްސަލަ ތަހުގީގު ނުކުރާ ކަމަށް ނަޝީދު ވިދާޅުވި ނަމަވެސް، އެ މައްސަލަ ފުލުހުން ތަހުގީގުކޮށް، ދައުވާ ކުރަން ދެ މީހެއްގެ މައްޗަށް ޕީޖީން ހިތަދޫ މެޖިސްޓްރޭޓް ކޯޓަށް ވެސް ހުށަހެޅި އެވެ.
އަދި ކޯޓުން ހުކުމްކޮށްފައި ވަނީ ދައުލަތު ދައުވާ ކުރި އެ ދެ މީހުން މޭޔަރު ސޯބެ އަށް ހަމަލާ ދިން ކަމަށް ޝަރީއަތަށް ސާބިތު ނުވާ ކަމަަށެވެ. އެ ގޮތަށް ހުކުމް ކުރީ އެޕްރީލް 17، 2013 ގަ އެވެ.
މި ހުކުމާ ގުޅިގެން ސޯބެ ވިދާޅު ވަނީ ކޯޓަށް ވެސް އެކި ފަހަރުމަތިން ވަރަށް ބޮޑަށް ފާޑު ވިދާޅުވެފައިކަން ފާހަގަ ކުރެވެ އެވެ.