އައްޑޫ ސިޓީގައި ކޮވިޑް-19 އަށް 42 މީހުން މިއަދު ޕޮޒިޓިވްވެއްޖެ އެވެ.
އައްޑޫ އީއޯސީއިން ހާމަކޮށްފައިވާ ގޮތުގައި މިއަދު އެންމެ ގިނަ ކޭސްތައް ފެނިފައިވަނީ ހިތަދޫ އަވަށުންނެވެ. އެގޮތުން، ހިތަދޫ އަވަށުން 21 ކޭސް ފެނިފައިވާއިރު، މަރަދޫއިން 11 ކޭސް، މަރަދޫފޭދޫއިން 1 ކޭސް އަދި ފޭދޫއިން 9 ކޭސް ވަނީ ފެނިފައެވެ. އަދި ހުޅުދޫއާއި މީދޫން އެންމެ ކޭހެއްވެސް ފެނިފައިނުވާއިރު، ބަލިން ފަސޭހަނުވާ މީހުންގެ ޢަދަދު މިހާރުވަނީ 277ގައެވެ.
އައްޑޫ ސިޓީގައި ކޮވިޑް-19ގެ ހާލަތު ގޯސްވަމުން އަންނައިރު، މިވަގުތު އެކްޓިވް ޑައިރެކްޓް ކޮންޓެކްޓުންގެ ގޮތުގައި 245 މީހުން އެބަތިއްބެވެ. އަދި އަލަށް 121 ސާމްޕަލް މިއަދު ނަގާފައިވާއިރު، ހޮސްޕިޓަލުގައި އެޑްމިޓްކޮށްގެން ފަރުވާދެމުން އަންނަ 4 މީހުން އެބަތިއްބެވެ.
ކޮވިޑް-19ގެ ކޭސްތައް އައްޑޫއިން ފެނުމާއެކު މޮނިޓަރިންގެ ހާލަތަށް ވަނީ ގެނެވިފައެވެ. ނަމަވެސް އައްޑޫގެ ވެކްސިން ޖެހޭ އާބާދީގެ 90 އިންސައްތައަށްވުރެ ގިނަ މީހުން ވެކްސިން ފުރިހަމަކޮށްފައިވާތީވެ، ދަތުރުފަތުރު ކުރުމުގައި ލުއިތަކެއް ވަނީ ދީފައެވެ.