މި އަހަރުގެ އެންމެ އުންމީދީ އެއް ފިލްމުގެ ތެރޭގައި ހިމެނޭ މަދޫރީ ޑިކްޝިޓާއި ޖޫހީ ޗަވްލާ ފުރަތަމަ ފަހަރަށް ސްކްރީނުން އެކުގައި ފެންނަ ފިލްމް "ގްލާބް ގޭންގް" ގެ ފުރަތަމަ ޓްރެއިލާ މިއަދު ލޯންޗްކޮށްފި އެވެ.
މި ޓްރެއިލާ އާންމުކޮށްފައި މި ވަނީ ގިނަ އަހަރުތަކެއްގެ މެދުކެނޑުމަކަށް ފަހު މަދޫރީ ކުޅުނު ފުރަތަމަ ފުރަތަމަ "ދޭޅް އިޝްގިޔާ" އާ އެކުގަ އެވެ. މި ފިލްމް މިއަދު ވަނީ ސިނަމާތަކުގައި ދައްކަން ފަށައިފަ އެވެ.
މަދޫރީ އާއި ޖޫހިއަކީ 1990 ގެ އަހަރުތަކުގައި ބޮލީވުޑްގައި އޭރު ވިދަމުން ދިޔަ އެންމެ ވާދަވެރި ބަތަލާއިންގެ ތެރޭގައި ހިމެނޭ ކުޅަދާނަ ދެ ތަރިންނެވެ.
އެކަމަކު މިހާތަނަށް މި ދެ ތަރިން އެއް ފިލްމަކުން ފެނިފައެއް ނުވެ އެވެ. އެހެން ނަމަވެސް "ގްލާބް ގޭންގް" އިން މި ދެ ތަރިން އެކުގައި ފެންނާތީ، މި ފިލްމަށް ގިނަ ބަޔަކު އަންނަނީ ކެތްތެރި ކަމެެއް ނެތި އިންތިޒާރު ކުރަމުންނެވެ.
"ގްލާބް ގޭންގް" ގައި މަދޫރީ ފެނިގެން ދާނީ އަންހެނުންނަށް ކުރާ ގެވެށި އަނިޔާތަކާ ދެކޮޅަށް، އަސުރުމާ ކުލައި ސާޅީ އަޅައިގެން އެ މީހުންގެ ހައްގު ހޯދަން ނިކުންނަ ޖަމާއަތެެއްގެ އިސް ލީޑަރެއްގެ ގޮތުގަ އެވެ.
އަދި ޖޫހީ ފެނިގެން ދާނީ މަދޫރީ ކުރާ މަސައްކަތްތަކާ ދެކޮޅަށް މަސައްކަތް ކުރާ ނުބައިބައި ސިޔާސީ ލީޑަރެއްގެ ކެރެކްޓާއަކުންނެވެ.
އަނުބަވް ސިންހާ ޕްރޮޑިއުސްކޮށް، ސޯމިކް ސެން ލިޔެ، ޑައިރެކްޓްކޮށް އަދި މިއުޒިކް ވެސް ހަދާފައިވާ "ގްލާބް ގޭންގް" ސިނަމާތަކަށް އަންނާނީ މާޗް 7 ގަ އެވެ.