އައްޑޫ ސިޓީގައި ކޮވިޑް-19 އަށް 28 މީހުން މިއަދު ޕޮޒިޓިވްވެއްޖެ އެވެ.
އައްޑޫ އީއޯސީއިން ހާމަކޮށްފައިވާ ގޮތުގައި މިއަދު އެންމެ ގިނަ ކޭސްތައް ފެނިފައިވަނީ ހިތަދޫ އަވަށުންނެވެ. އެގޮތުން، ހިތަދޫ އަވަށުން 12 ކޭސް ފެނިފައިވާއިރު، މަރަދޫއިން 2 ކޭސް، މަރަދޫފޭދޫއިން 1 ކޭސް އަދި ފޭދޫއިން 3 ކޭސް ވަނީ ފެނިފައެވެ. މީދޫއިން 7 ކޭސް ފެނިފައިވާއިރު، ހުޅުދޫއިން އެއްވެސް ކޭހެއް ފެނިފައިނުވެއެވެ. އަދި އެހެނިހެން 3 ކޭސްވެސް މިއަދު ވަނީ ފެނިފައެވެ. މިއާއެކު އައްޑޫ ސިޓީގައި މި ބަލިން ފަސޭހަނުވާ މީހުންގެ ޢަދަދު 383 އަށް އަރައެވެ.
އައްޑޫ ސިޓީގައި ކޮވިޑް-19ގެ ހާލަތު ގޯސްވަމުން އަންނައިރު، މިވަގުތު އެކްޓިވް ޑައިރެކްޓް ކޮންޓެކްޓުންގެ ގޮތުގައި 232 މީހުން އެބަތިއްބެވެ. އަދި އަލަށް 189 ސާމްޕަލް މިއަދު ނަގާފައިވާއިރު، ހޮސްޕިޓަލުގައި އެޑްމިޓްކޮށްގެން ފަރުވާދެމުން އަންނަ 2 މީހުން އެބަތިއްބެވެ.
ކޮވިޑް-19ގެ ކޭސްތައް އައްޑޫއިން ފެނުމާއެކު މޮނިޓަރިންގެ ހާލަތަށް ވަނީ ގެނެވިފައެވެ. ނަމަވެސް އައްޑޫގެ ވެކްސިން ޖެހޭ އާބާދީގެ 90 އިންސައްތައަށްވުރެ ގިނަ މީހުން ވެކްސިން ފުރިހަމަކޮށްފައިވާތީވެ، ދަތުރުފަތުރު ކުރުމުގައި ލުއިތަކެއް ވަނީ ދީފައެވެ.