ވެރިކަމުގައި ތިބި ފަރާތްތަކުން އަމަލުކުރާ ގޮތަކުން ރާއްޖޭގެ މިނިވަންކަން ގެއްލިގެން ހިނދާނެކަމުގެ ބިރު ރައްޔިތުންގެ ހިތްތަކުގައި މިއަދު އެބަ އޮތް ކަމަށް ތިމަރަފުށީ ދާއިރާގެ ރައްޔިތުންގެ މަޖިލީހުގެ މެންބަރު އަބްދުﷲ ރިޔާޒް ވިދާޅުވެއްޖެ އެވެ.
ނަސްރުގެ ދުވަސް ފާޙަގަ ކުރުމަށް ރޭ ކުޅުދުއްފުށީ ސިޓީގައި އެމްއެންޕީއިން ބޭއްްވި ޖަލްސާގައި އެ ޕާޓީގެ ނައިބު ރައީސްކަންވެސް ކުރައްވަމުން ގެންދަވާ ރިޔާޒް ވިދާޅުވީ ރާއްޖޭގެ މިނިވަން ގެއްލިދާނެތީ މިއަދުގެ ރައްޔިތުންގެ ކަންބޮޑުވުންތަކެއް އެބަ ހުރި ކަަމަށެވެ.
"އަޅުގަނޑުމެނަށް އެބަ ފެނޭ ބޭރުގެ އެކި ނުފޫޒުތައް ވެރިކަމުގައި ތިއްބަވާ އެކި އެކި ފަރާތްތަކަށް ކުރެވޭ ކަންތައްތަކުގެ ސަބަބުން އަޅުގަނޑުމެންގެ މިނިވަން ގެއްލިދާތަން. މިއަދު އަޅުގަނޑުމެނަށް އެކަންކަން އެބަ އިހްސާސް ކުރެވޭ،" ކުރިން ޕޮލިސް ކޮމިޝަނަރުކަންވެސް ކުރައްވާފައިވާ ރިޔާޒް ވިދާޅުވި އެވެ.
މިނިވަކަން ގެއްލިގެންދާ ފަދަ ބޭރުގެ ނުފޫޒުތައް ރާއްޖެއަށް އަންނަ ކަމަށް ދިވެހިން ގަބޫލުކުރާ ކަމަށާއި އެހެން ކަމުން ހާރިޖީ ސިޔާސަތާމެދު ވިސްނަންޖެހޭ ކަަމަށް އޭނާ ވިދާޅުވި އެވެ.
" އަޅުގަނޑުމެންގެ ވެރިކަމުގައި ތިއްބެވި ބޭފުޅުން އެބަ ގަބޫލުކުރައްވަން އެބަ ޖެހޭ ވަކި އެއް ގައުމަކަށް ހުރިހާ ކަމެއްގައި އަޅުގަނޑުމެން ބަރޯސާވެގެން ނުވާނެކަން. އަޅުގަނޑުމެންގެ ހާރިޖީ ސިޔާސަތުތައްވެސް އޮންނަން ޖެހޭކަން އަޅުގަނޑުމެންގެ މިނިވަންކަން ހިފެހެއްޓޭނެ މިންވަރަށް." ރިޔާޒް ވިދާޅުވި އެވެ.
އެމްއެންޕީއަކީ ގައުމީ ވިސްނުމުގައި އަބަދުވެސް މަސައްކަތްކުރާނެ ޕާޓީއެއް ކަމަށާއި 2023ގައި ރައްޔިތުންގެ ކުރިމައްޗަށް އެކި ސިޔާސީ ލީޑަރުން އަންނައިރު މިނިވަންކަމާމެދު ސުވާލު ނުއުފެދޭނެ ގޮތައް ވެރިކަންކުރާނެ ބަޔަކާމެދު ވިސްނަންޖެހޭ ކަމަށްވެސް އޭނާ ވިދާޅުވި އެވެ.