މި މަހުގެ 18 ގައި ބާއްވާ ލޯކަލް ކައުންސިލް އިންތިޚާބުގެ ސަލާމަތީ ކަންކަން ބަލަހައްޓައި އިންތިޚާބަށް އަމާން ވެއްޓެއް ޤާއިމް ކުރުމަށް "އޮޕަރޭޝަން ރަމަތަ" އިގެ ނަމުގައި އޮޕަރޭޝަނެއް ހިންގާނެ ކަމަށް ފުލުހުން ބުނެފި އެވެ.
ފުލުހުންގެ އެގްޒެކެޓިވް ބޯޑުން މިނަން ފާސްކޮށްފައި ވަނީ ބޯޑުގެ ބައްދަލުވުމުގައި ބައިވެރިން މަޝްވަރާ ކުރުމަށްފަހު އެވެ. ރަމަތައިގެ މާނައަކީ ހިމޭން ކަމަށްވެފައި ހިމޭންކަމާއެކު ކަންކަން ހަމަޖެއްސުމަކީ މިއޮޕަރޭޝަންގައި ފުލުހުންގެ ދައުރުކަމަށް ވާތީ އެވެ.
ކޮމިޝަނަރު އޮފް ޕޮލިސް ޙުސައިން ވަޙީދު ރިޔާސަތު ބެލެހެއްޓެވި މި ބައްދަލުވުމުގައި އޮޕަރޭޝަން ކޮމާންޑަރު އަދި ސެންޓްރަލް އޮޕަރޭޝަންގެ ޑެޕިއުޓީ ހެޑް ޗީފް ސުޕްރިންޓެންޑެންޓް އޮފް ޕޮލިސް އިސްމާޢީލް ނަވީން ވަނީ މިއޮޕަރޭޝަންގެ މަސައްކަތް މިހާރު ކުރިޔަށް ގޮސްފައިވާ ހިސާބު އެގްޒެކެޓިވް ބޯޑަށް އޮޅުންފިލުވައި ދެއްވާފަ އެވެ.
މިގޮތުން އޮޕަރޭޝަންގައި އަތޮޅުތަކުގައި އިސްކޮށް ޙަރަކާތްތެރިވާ ފަރާތްތަކާއި ބައްދަލުކުރެވިފައިވާ ކަމަށާއި ސިޔާސީ ޕާޓީތަކުގެ މަންދޫބުންނާ ބައްދަލުކުރެވި މަޝްވަރާ ކުރެވިފައިވާކަމުގައި ވަނީ ވިދާޅުވެފަ އެވެ.
އަދި އޮޕަރޭޝަންގައި މާލެ އާއި އަތޮޅުތަކުގައި ފުލުހުން ޙަރަކާތްތެރި ވާނެ ރަށްރަށް ކަނޑައެޅި އެރަށްރަށް ފުލުހުންނަށް އެންގިފައިވާ ކަމަށް ވެސް ޗީފް އެސްޕީ އިސްމާޢީލް ނަވީން ވިދާޅުވި އެވެ.
އޮޕަރޭޝަން ރަމަތައިގެ ޙަރަކާތްތައް ކުރިޔަށް ގެންދިއުމަށް އަތޮޅުތަކަށްދާ ފުލުހުން މި މަހުގެ 13 ވަނަ ދުވަހުން ފެށިގެން މާލޭން ފުރަން ފަށާނެ އެވެ.