ހުވަދު އަތޮޅުން އައްޑުއަށް ދަތުރު ކުރަމުން ދަނިކޮށް ސ.މަރަދޫ "ރަހާ ދޯނި" އިންޖީނު ހުއްޓިގެން ސަދަން އޭރިއާ ކޯސްޓްގާޑު ސްކޮޑްރަންއިން އެހީތެރިކަން ފޯރުކޮށްދީފި އެވެ.
"ރަހާ" ދޯނި އައްޑު ސ. ވިލިގިލި ރިސޯޓް ބޮއި އާ ދިމާލުން ގާތްގަނޑަކަށް ދެ މޭލު ބޭރަށް އިންޖީނު ހުއްޓިފައިވަނީ އިއްޔެ ރޭ 10:30 ހާއިރު އެވެ. ބޮޑު މިނިުގައި 103 ފޫޓުގެ މި މަސް ދޯނީގެ އިންޖީނު ހުއްޓުނުއިރު ދޯނީގައި 25 ފަޅުވެރިން ތިއްބެވެ.
މި ދޯނީގެ އިންޖީނު ހުއްޓިގެން އުޅޭ ކަމުގެ ރިޕޯޓް ސަދަން އޭރިއާ ކޯސްޓްގާޑް ސްކޮޑްރަން އަށް ލިބިފައިވަނީ އެ ރޭ ދަންވަރު 2:21 ހާއިރު އެވެ.
މި ހާދިސާގެ ރިޕޯޓް ކޯސްޓް ގާޑަށް ލިބުމުން ދޯނީގެ ވެރިފަރާތުން ހަމަޖެއްސި އިންޖިނިއަރަކާއި އެކު ހާބަރު ޕެޓްރޯލް ވަނީ ފަތިހު 4:05 ގައި ދޯނި އޮތް ސަރަހައްދަށް ދިއުމަށްޓަކައި ދަތުރު ފަށައި 5:00 ގައި ދޯނި އޮތް ސަރަހައްދަށް ގޮސް އިންޖިނިއަރުގެ އެހީގައި ދޯނީގެ އިންޖީނަށް ދިމާވި މައްސަލަ ހައްލުކޮށް ދޯނި ވަނީ މަހަށް ފުރުވާލައިފަ އެވެ.