މޯލްޑިވްސް ނޭޝަނަލް ޕާޓީ(އެމްއެންޕ)އިން އައްޑޫ އާއި ފުވައްމުލަކު ސިޓީއަށް ކުރި ދަތުރު ވަރަށް ކާމިޔާބު ކަމަށް އެ ޕާޓީގެ އިންތިގާލީ ރައީސް މުހައްމަދު ނާޒިމް ވިދާޅުވެއްޖެ އެވެ.
މެމްބަރޝިޕް އިތުރުކުރުމަށް އެމްއެންޕީއިން އައްޑޫ އާއި ފުވައްމުލަކަށް މި މަހު ފަސް ވަނަ ދުވަހުން ފެށިގެން އިއްޔެގެ ނިޔަލަށެވެ. މި ދަތުރާ ގުޅޭ ގޮތުން ސޯޝަލްމީޑިޔާ މެދުވެރިކޮށް އެ ޕާޓީން އާއްްމުކުރި ވީޑިއޯއެއްގައި ނާޒިމް ވިދާޅުވީ އެ ދަތުރަކީ ރައްޔިތުންގެ އިހްސާސްތައް ދެނެގަތުމަށް ކުރި ދަތުރެއް ކަމަށެވެ.
"މި ދަތުރަކީ ﷲ އިރާދަފުޅާއެކު ވަރަށް ކާމިޔާބުކޮށް ކުރެވުނު ދަތުރެއް ކަމަށް އެމްއެންޕީއިން ގަބޫލުކުރަން.މޯލްޑިވްސް ނޭޝަނަލް ޕާޓީއަކީ ރައްޔިތުންނާ ވަަރަށް ގާތުން މަސައްކަތްކުރާނެ ޕާޓީއެއް. އެކަން އައްޑޫ ސިޓީގެ ރައްޔިތުނަށާއި ފުވައްމުލަކުގެ ރައްޔިތުންނަށް ސާބިތުވެގެންދާނެ،" ނާޒިމް ވިދާޅުވި އެވެ.
އެމްއެންޕީގެ ލީޑަރޝިޕެން ސައުތަހަ ކެރާ ދަތެރެގެ ތެރެއެން: ފުވައްމުލައް ސިޓީއެ ޕާޓީގެ މެމްބަރޝިޕް އިތިރިކެރުމަހަ ބޭއްވުން ހަރަކާތެ ތެރެއިން#MNPTrips #MNPSouthRegion #MNPFuvahmulah pic.twitter.com/mOkdjvhps3
— Maldives National Party (@MNP_Secretariat) November 9, 2021
ނާޒިމް ވިދާޅުވީ އައްޑޫ އާއި ފުވައްމުލަކުގައި ގިނަ މައްސަލަތަކެއް އެބަ ހުރި ކަމަށާއި މިރަށްތަކުން ކުރެވުނު އިހްސާސްތައް އޭނާ އެކަންކަން އެކި ފޯރަމްތަކުގައި ހާމަކުރަމުން ގެންދަވާނެ ކަމަށެވެ. އޭނާ ވަނީ އެ ޕާޓީގެ މަސައްކަތުގައި އެއްބާރުލުން ދިނުމަށް އެ ދެ ސިޓީގެ ރައްޔިތުންގެ ކިބައިން އެދިވަޑައިގެންފަ އެވެ.
ނާޒިމް ވިދާޅުވީ މި ހަފްތާގައި އެ ޕާޓީން ފ އަތޮޅަށް އަދި އަންނަ ހަފްތާގައި ގދ، ގއ އަތޮޅަށް ދަތުރުކުރުމަށް ހަމަ ޖެހިފައިވާ ކަމަށެވެ.
އައްޑޫ އާއި ފުވައްމުލަކު ސިޓީއަށް އެމްއެެންޕީއިން ކުރި ދަތުރުގައި އެ ޕާޓީގެ ލީޑަރޝިޕްގެ ބޭފުޅުން ވަނީ ސިޓީ ކައުންސިލާއި ޖަމިއްޔާތަކާއިވެސް ބައްދަލުކޮށްފަ އެވެ.