މުޅި ދުނިޔޭގައި ފެތުރެމުންދާ ކޮވިޑް19 އަކީ އާދައިގެ ރޯގާއެއް ކަމަށް ކަނޑައަޅަން ވެއްޖެ އައްޑޫ މީދޫ ހުޅުމީދޫ ހެލްތް ސެންޓަރުގެ
ސީނިއާ އެޑްމިނިސްޓޭޓިވް އިބްރާހިމް ދީދީ ވިދާޅުވެއެވެ.
އިބްރާހިމް ދީދީ އޭނާ ފޭސްބޫކްގައި ޖެހި ސްޓޭޓަސްގައި ވިދާޅުވީ ކޮވިޑަކީ އާދައިގެ ރޯގާއެއް ކަމަށް ހަމަޖައްސާ ކޮވިޑްގައި ކަންކަން ކައުންސިލްތަކާ ހަވާލުކުރަންޖެހޭ ކަމަށެވެ.
ކޮވިޑަކީ އާދައިގެ ރޯގާއެއްކަމަށް ކަނޑައަަޅަންވެއްޖެ ކަމަށް އިބްރާހިމް ދީދީ ވިދާޅުވެފައިވާއިރު އައްޑޫ މި ވަގުތުވެސް އޮތީ މޮނިޓަރިން ހާލަތައް ގެނެސްފަ އެވެ. އަދި ކޮވިޑުން ރައްކާތެރިވުމުގެ ގޮތުން ކަމަށްބުނެ އެޗްޕީއޭއިން އައްޑޫގައި އޮތީ ކާފިއު އިއުލާންކޮށްފަ އެވެ.
ކޮވިޑް ބައްޔަށް ފަރުވާދެމުންދަނިކޮށް އައްޑޫއިން މިހާތަނަށް 9 މީހަކު ވަނީ މަރުވެފަ އެވެ. މި ވަގުތުވެސް އައްޑޫގައި ދެ މީހަކަށް އެޑްމިޓްކޮށްގެން މި ބައްޔަށް ފަރުވާ ދެމުންދާއިރު މި ވަގުތު އައްޑޫގައި ކޮވިޑަށް ޕޮސިޓިވްވެފައިވާ 383 މީހުން އެބަ ތިއްބެވެ. މިހާތަނަށް އައްޑޫއިން ކޮވިޑްޖެހިފައިވަނީ 2292 މީހަކަށެވެ.