ކުޑަކުއްޖަކަށް ޖިންސީ ގޯނާ ކުރި މައްސަލައިގައި އައްޑޫސިޓީން ހައްޔަރު ކުރި ފުލުސް މީހާގެ މައްޗަށް ދައުވާ ކޮށްފިއެވެ.
މިމައްސަލައާ ގުޅިގެން ޕީޖީން ދައުވާ ކޮށްފައިވަނީ ޏ.ފުވައްމުލައް، މާދަޑު، އޮމާން، އަޙްމަދު ނަޒުމީނުގެ މައްޗަށެވެ.
މިމައްސަލައިގައި ޕީޖީން ބުނެފައިވަނީ ނަޒުމީނު، 2020 ވަނަ އަހަރުގެ ކުރީކޮޅުން ފެށިގެން އެކިދުވަސްމަތިން އިތުރުބާރުކުރެވޭ މަޤާމެއްގައި ހުރެ ޢުމުރުން 18 އަހަރު ނުފުރޭ ކުއްޖަކަށް ބިރުދައްކައިގެން އެކުއްޖާގެ އޮރިޔާން މަންޒަރު ދައްކުވައިދޭ ފޮޓޯ ނެގުމަށްފަހު އެފޮޓޯ ބޭނުންކޮށްގެން ބްލެކްމެއިލްކޮށް އެ ކުއްޖާއަށް ޖިންސީ ގޯނާ ކޮށްފައިވާ ކަމަށެވެ.
އޭނާގެ މައްޗަށް ދައުވާކޮށްފައިވަނީ، ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުސޫލުތަކަކަށް ޢަމަލުކުރުމުގެ ޤާނޫނު ގެ 9 ވަނަ މާއްދާގެ (ހ) އާ ޙަވާލާދީ، އެ މާއްދާގެ (ށ) ގެ ދަށުން، ކުޑަކުއްޖަކު އިތުބާރުކުރަންޖެހޭ މަޤާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ ޢަމަލެއް ހިންގުމުގެ ކުށުގެ ދައުވާއެވެ.
އެ ފުލުސް މީހާގެ މައްސަލަ ނުބަލާތީ އަދި އޭނާ ހައްޔަރު ނުކޮށް ހުރުމުން އައްޑޫ ހިތަދޫގައި ގިނަ ރައްޔިތުންތަކެއް އެއްވެ ނުރުހުންވެސް ފާޅުކޮށްފައިވެއެވެ. އެމީހާ ދިރިއުޅޭ ގެކައިރިއަށް ގިނަ އަދަދެއްގެ ބަޔަކު އެއްވުމާ ގުޅިގެން ފުލުހުންނަށް ޖެހުނީ ބާރުގެ ބޭނުންކޮށްގެން މީހުން ފަހަތަށް ޖައްސާށެވެ.
މިމައްސަލައިގައި ކޯޓު އަމުރެއްގެ ދަހުން ފުލުހުން އަޙްމަދު ނަޒުމީނު ހައްޔަރު ކޮށްފައިވަނީ ސެޕްޓެމްބަރު 16 ވަނަ ދުވަހުގެ ރޭގެ ވަގުތެއްގައެވެ. އަދި އޭނާގެ ބަންދާމެދު ގޮތެއް ނިންމުމަށް ހިތަދޫ މެޖިސްޓްރޭޓް ކޯޓަށް ގެންދިއުމުން ޝަރީއަތް ނިމެންދެން އޭނާ ބަންދު ކޮށްފައިވެއެވެ.