ސަރުކާރުން ކަނޑައެޅި މިނިމަމްވޭޖުގެ އެންމެ ހެޔޮ އަސަރެއް ކުރާނީ ޓޫރިޒަމް ދާއިރާގައި މަސައްކަތްކުރާ މުވައްޒަފުންނަށް ކަމަށް ރައީސުލް ޖުމްޙޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
މިރޭ ބޭއްވި ޖުމްހޫރީ ދުވަހުގެ ރަސްމީ ޖަލްސާ ވާހަކަފުޅު ދައްކަަވަމުން ރައީސް ވިދާޅުވީ މި ސަރުކާރުން ކަނޑައެޅި އެންމެ ކުޑަވެގެންދެވޭނެ އުޖޫރައަކީ މި ޖުމްހޫރީ ދުވަހު ދިވެހި ރައްޔިތުންނަށް ދެވޭ އެންމެ ބޮޑު ހަދިޔާ ކަމަށެވެ.
"މި ޖުމްހޫރީ ދުވަސް ގެނެސްދޭ އެންމެ ބޮޑު ހަދިޔާއަކީ، އެންމެ ކުޑަވެގެން ދެވޭނެ އުޖޫރަ، ސަރުކާރުން ކަނޑައެޅި އެޅުން. މަސައްކަތްތެރިއަކަށް ދޭންޖެހޭ އެންމެ ބޮޑު ޙައްޤަކީ، އޭނާއަށް ޙައްޤު އުޖޫރަ. ޖުމްހޫރިއްޔަތުގެ ހިޔަލުގައި ފިނިކަމެއް އެކުލެވޭނީ، މަސައްކަތްތެރީންނަށް ޙައްޤު ލިއްބައިދީގެން." ރައީސް ވިދާޅުވި އެވެ.
މިނިމަމް ވޭޖް ތަންފީޛުވުމުން، އޭގެ ހެޔޮ ބަދަލު ފަތުރުވެރިކަމުގެ ޞިނާޢަތުގައި މަސައްކަތްކުރާ ދިވެހި މުވައްޒަފުންނަށް. ލިބުމުގެ އިތުރަށް ސަރުކާރުގެ އިދާރާތަކުގައި މަސައްކަތްކުރާ މުވައްޒަފުންގެ، ގިނަ ޢަދަދެއްގެ މުވައްޒަފުންނަށް މި ހެޔޮ ބަދަލު އަންނާނެކަން ރައީސް ފާހަގަ ކުރެއްވި އެވެ.
މިނިމަމް ވޭޖް ކަނޑައެޅުމުގައި، ވަޒީފާ ދޭ ފަރާތާއި، ވަޒީފާ އަދާކުރާ ފަރާތުގެ މަސްލަޙަތާއި، ޙައްޤުތަކަށް ސަރުކާރުން ވިސްނާފައިވާނެ ކަމަށް ރައީސް ވިދާޅުވި އެވެ.
"އެކަށީގެންވާ މުސާރައެއް ކަނޑައަޅާއިރު، ވިޔަފާރިތައް ފުނޑި ބަނގުރޫޓްވިޔަ ނުދިނުމަށްވެސް ސަރުކާރުން ވިސްނިން. އޭގެ މައްޗަށް ބިނާކޮށް، މިހާރު މިވަނީ ފުރަތަމަ ފަހަރަށް، މިނިމަމް ވޭޖް ކަނޑައަޅާފައި. މިއީ ދިވެހި ތާރީޚުގައި، މަސައްކަތްތެރިންނަށްޓަކައި މިހާތަނަށް އެޅުނު އެންމެ ހަރުދަނާ ބިންގާ. މީގެ ސަބަބުން، ވަޒީފާތަކަށް ޤާބިލު މުވައްޒަފުން ހޯދުމަށް މަގުފަހިވެ، އުފެއްދުންތެރިކަމާއި ނަފާވެރިކަން އިތުރުވުމަށް މި ސިޔާސަތު ބާރުއަޅާނެ،" ރައީސް ވިދާޅުވި އެވެ.
މީގެ އިތުރުން ރައީސް ދެއްކެވި ވާހަކަފުޅުގައި ވަޒީފާ ނެތް ފަރާތްތަކަށް ފަސޭހަކަމާއެކު ވަޒީފާއެއް ހޯދޭނެ މަގެއް އޮންނަންޖެހޭނެ ކަމަށް ފާހަގަ ކުރެއްވި އެވެ. ވަޒީފާދޭ ފަރާތްތަކަށް، ފަސޭހަކަމާއެކު ރެކްރޫޓްމަންޓް ޕްރޮސެސްއެއް ފަހިކޮށްދިނުމަށް، ސަރުކާރުގެ ސިޔާސަތެއް އެބައޮތް ކަމަށާއި އޭގެ ދަށުން ޖޮބް ސެންޓަރުގެ އޮފީސްތައް، އަތޮޅުތެރޭގައި ޤާއިމުކުރުމަށް އަންނަ އަހަރުގެ ބަޖެޓުގައި ހިމެނިފައިވާނެ ކަމަށް ވެސް ރައީސް ވިދާޅުވި އެވެ.