ޑޮކްޓަރީ ބޭސްތައް ވިއްކާއިރު ފާއިދާގެ ގޮތުގައި އެންމެ ގިނަވެގެން ނެގޭނީ 100 އިންސައްތަ ކަމަށް ސިއްހަތާބެހޭ ވުޒާރާއިން ކަނޑައަޅައިފިއެވެ.
ހެލްތު މިނިސްޓްރީން މިގޮތަށް ނިންމާފައިވަނީ ސިއްހީ ހިދުމަތް ދިނުމުގެ ގާނޫނުގައި ބޭހުގެ އެންމެ މަތީ އަގު ކަނޑައަޅަން ވާނެކަމަށް ބުނެފައިވާތީއެވެ. އަދި މިއާއެކު ކުރިއަށް އޮތް އަހަރުން ފެށިގެން ބޭސް ސިޓީގައި ލިޔާނީ ބޭހުގެ އަސްލު ނަން ކަމަށާއި، ބްރޭންޑު ނަން ނޫންކަމަށް ހެލްތު މިނިސްޓްރީން ވަނީ ބުނެފައެވެ. އަދި މިގޮތަށް އަމަލުކުރުމުން އެކިއެކި ބްރޭންޑް ނަމުގައި އަގުބޮޑުކޮށް ބޭސް ވިއްކުން ހުއްޓޫވޭނެ ކަމަށްވެސް އެ މިނިސްޓްރީން ބުނެއެވެ.
ހެލްތު މިނިސްޓްރީން ހާމަކޮށްފައިވާ ގޮތުގައި ބޭހުގެ އަގު ކޮންޓްރޯލް ކުރުމުގެ މަސައްކަތް ކުރިއަށް ގެންދާނީ ދެ ފޭސްއަކަށެވެ. އެގޮތުން ފުރަތަމަ ފޭސްގައި ހުރިހައި އަސާސީ ބޭހަަކަށް މެކްސިމަމް ރީޓެއިލް ޕްރައިޒް ތަންފީޒު ކުރާނެ ކަމަށާއި، ދެވަނަ ފޭސްގައި އިމްޕޯޓްކުރާ ހުރިހާ ބޭހަކަށް މެކްސިމަމް ރީޓެއިލް ޕްރައިޒް ތަންފީޒުކުރަން ފަށާނެއެވެ.
ސަރަހައްދީ ގައުމުތަކާ އަޅާ ބަލާއިރު ރާއްޖޭގެ ބޭހުގެ އަގުތައް ހުރީ އެވްރެޖްކޮށް 75.9 އިންދައްތަ މަތީގައެވެ. އެހެންކަމުން މެކްސިމަމް ރީޓެއިލް ޕްރައިޒް ކަނޑައެޅުމުން އާސަންދައިގެ ދަށުން ދޭ ޚިދުމަތްތައް ދެމެހެއްޓެނިވި މިންގަނޑަކަށް ގެނެވޭއެވެ.