ރާއްޖޭގައި އިންޓަނެޝަނަލް އެއާޕޯޓް އޮތް ދެ ސަރަހައްދަކުން ޕާސްޕޯޓް ދޫކުރާ ގޮތަށް ހެދުމުގެ ވިސްނުންތަކެއް ގެންގުޅެމުން އަން ކަމަށް އިމިގްރޭޝަން ކޮންޓްރޯލަރު ހަސަން އަލީ ވިދާޅުވެއްޖެ އެވެ.
ނަމަވެސް ޕާސްޕޯޓް ދޫކުރާނީ ކޮން ދެ ސަރަހައްދަކުން ކަމެއް އަދި ކަނޑައެއް ނާޅަ އެވެ. އިމިގްރޭޝަންގެ ވިސްނުން ހުރީ އިންޓަނޭޝަނަލް އެއާޕޯޓްތަކުން ޕާސްޕޯޓްދޫ ކުރެވޭނެ ގޮތް ހެދުމެވެ.
މާލެ އެއާޕޯޓް ފިޔަވައި ރާއްޖޭން ބޭރަށް އިންޓަނެޝަނަލް ފްލައިޓްތައް ބާއްވާ ދެ އެއާޕޯޓަކީ ގަން އިންޓަނެޝަނަލް އެއާޕޯޓާއި ހދ. ހަނިމާދޫ އެއާޕޯޓެވެ.
އެހެންވެ ބޮޑަށް ބެލެވެނީ ޕާސްޕޯޓް ދޫކުރާނީ މި ދެ އެއާޕޯޓުން ކަމަށް ގަބޫލް ކުރެވެ އެވެ.
ގައުމީ އެއާލައިން މޯލްޑިވިއަނުން މިދިޔަ އަހަރުގެ އޮގަސްޓް މަހު ސްރީ ލަންކާ އަށް ދަތުރު ފެށުމާ އެކު ވެސް، އައްޑޫން ޕާސްޕޯޓް ދޫކުރެވޭނެ ނިޒާމެއް ހެދުން މުހިއްމު ކަމަށް ގިނަ ބަޔަކު ބުނެފައިވެ އެވެ.
އެހެން ނަމަވެސް އެކަމަށް މަގުފަހު ނުވެ އޮއްވައި މޯލްޑިވިއަނުން ވަނީ އެ ދަތުރުތައް ހުއްޓާލައިފަ އެވެ.
އައްޑުއަކީ މިހާރު ވެސް އިމިގްރޭޝަންގެ ޔުނިޓެއް ހުރެެގެން، ޕާސްޕޯޓަށް އެޕްލައި ކުރުމުގެ ފުރުސަތު އޮތް ސަރަހައްދެކެވެ. އަދި އައްޑޫގައި ހުރި ޕޯސްޓް އޮފީސްތައް މެދުވެރިކޮށް ވެސް ނޮން އިލެކްޓްރޯނިކް ޕާސްޕޯޓަށް އެޕްލައި ކުރެވެ އެވެ.
އިމިގްރޭޝަނުން އިއްޔެ ވަނީ މި ހިދުމަތް އިތުރު ފަސް ސަރަހައްދަކުން ވެސް ދޭން ފަށައިފަ އެވެ.
އެއީ ހަނިމާދު އާއި ޅ. ނައިފަރާއި ލ. ފޮނަދު އާއި ގއ. ވިލިނގިލީގެ އިތުރުން ފުވައްމުލަކެވެ.