އައްޑޫ ސިޓީ މީދޫ އެކުވެރިންގެ ޗޭނު ޖަމްޢިއްޔާއިން ކޮންމެ އަހަރު ބާއްވާ ބަދަހި ކަޕްގެ ޗެމްޕިއަނުންނަށް މި އަހަރު 10،000 ރުފިޔާ ދޭނެކަމަށް އެ ޖަމްޢިއްޔާއިން ބުނެފިއެވެ.
މިދިޔަ އަހަރުގެ ޗެމްޕިއަން ޓީމަށް 5،000 ރުފިޔާ ދީފައިވާއިރު، މިއީ އައްޑޫގައި ބޭއްވޭ އެންމެ ބޮޑު އެއް ނެޓްބޯޅަ މުބާރާތްކަން ފާހަގަކޮށްލެވެއެވެ.
މި މުބާރާތުގައި ބައިވެރިވުމުގެ ފުރުޞަތު 5 ޑިސެމްބަރާ ހަމައަށް ހުޅުވާލެވިފައިވާއިރު، މުބާރާތް ފަށަން ހަމަޖެހިފައިވަނީ ކުރިއަށް އޮތް އަހަރުގެ ޖެނުއަރީމަހުގެ 15 ވަނަ ދުވަހުގައެވެ.
މީދޫ ޗޭނު ޖަމްޢިއްޔާއިން ބުނެފައިވާ ގޮތުގައި ހުޅުދޫ-މީދޫގައި ތިބި މުއައްސަސާތަކަށް މި މުބާރާތުގައި ބައިވެރިވެވޭނެއެވެ. އަދި މިފަހަރުގެ މުބާރާތުގައި ބައިވެރިވާން ބޭނުން ފަރާތްތަކުން އެ ޖަމްޢިއްޔާ ގުޅުއްވުމަށްވެސް ވަނީ އެދިފައެވެ.
މިދިޔަ އަހަރުގެ މުބާރާތުގައި ޖުމުލަ 9 ޓީމުން ބައިވެރިވިއިރު، ސިޓީއިން ބޭރުގެ ގިނަ ކުޅުންތެރިންވެސް ވަނީ ބައިވެރިވެފައެވެ. އަދި ހުޅުދޫ-މީދޫގެ ގިނަ މުއައްސަސާތަކުން ބައިވެރިވެފައިވާއިރު، މި މުބާރާތަކީ ހުޅުދޫ-މީދޫގައި ބޭއްވޭ އެންމެ ބޮޑު ނެޓްބޯޅަ މުބާރާތްކަން ފާހަގަކޮށްލެވެއެވެ.