ފައިސާ އަތުލުމުގެ ބޭނުމުގައި ސިފައިންގެ ބޭކަލަކު ރަހީނުކޮށް، އަނިޔާކޮށްފިއެވެ.
ރާއްޖޭގެ އޮންލައިން ނޫހަކަށް މައުލޫމާތު ދެއްވަމުން އެ ސިފައިންގެ ބޭފުޅާގެ އާއިލީ މީހަކު ބުނީ، މާފަންނު އޭސް ހާޑްވެއާ ކައިރީގައި އޮންނަ ގޯޅިގަނޑަކުން ހިނގާފައި ދަނިކޮށް ރޭ 11:30 ހާއިރު ރަހީނުކުރި ކަމަށާއި، އަތުގައި ފައިސާ ނެތޭ ބުނުމުން ބޭންކް އެކައުންޓާއި ޕިން ނަންބަރު ދިނުމަށް ޑިމާންޑުކުރި ކަމަށެވެ. އަދި އެ މައުލޫމާތުތައްވެސް ނުދިނުމުން ކަރުގައި ހިފައި، ބަޔަކު އައިސް އޭނާ ހޭނައްތާލި ކަމަށެވެ.
ސިފައިންގެ ބޭފުޅާ ހޭނައްތާލުމަށްފަހު އެ ސަރަހައްދުގައި ހުރި ކޮޓަރިއަކަށް ގެންގޮސް ވަނީ އަނިޔާކޮށްފައެވެ. އަދި ހެނދުނު ވަންދެން އަނިޔާ ކުރަމުން ގެންދިޔަކަމަށް އާއިލާއިން ބުންޏެވެ.
މިކަމާއި ގުޅޭ ގޮތުން އެމް.އެން.ޑީ.އެފުން ވިދާޅުވީ، މިފަދަ މައްސަލަތަކަކީ ފުލުހުން ބަލާ މައްސަލަތައް ކަމަށާއި، އެހެންކަމުން މިކަމުގެ މައުލޫމާތުތައް ފޯރުކޮށްދެއްވާނީ ފުލުހުން ކަމަށެވެ.
އާއިލާއިން ހިއްސާކުރި ފޮޓޯތަކަށް ބަލާއިރު، އެ ބޭފުޅާއަށް އެކިވަރުގެ އަނިޔާތައް ވަނީ ދީފައެވެ. އަދި އެވަރުންވެސް އެއްވެސް ފާއިސާއެއް ނުދިނުމުން، މިއަދު ހެނދުނުގެ ވަގުތެއްގައި އައި.ޖީ.އެމް ހޮސްޕިޓަލުގެ ދޮރު ކުރިމައްޗަށް އޭނާ ވައްޓާލިކަމަށް އާއިލާއިން ވަނީ ބުނެފައެވެ.
އަނިޔާލިބުނު ސިފައިންގެ ބޭފުޅާއަށް މިވަގުތު އައި.ޖީ.އެމް ހޮސްޕިޓަލުގައި އަންނަނީ ފަރުވާ ދެމުންނެވެ. އަދި މިވަގުތު ހާލު ސްޓޭބަލްކަމަށް އާއިލާއިން ބުންޏެވެ.