ސ. ފޭދޫގައި އިމާރާތްކޮށްފައި ހުރި ހައުސިން ޔުނިޓްތަކުގެ ހާލަތު މިހާރު ހުރި ނެތް ގޮތް، ފޭދޫ އަވަށު އޮފީހުން ބަލައިފި އެވެ.
މިކަމުގައި އެ އެ އޮފީހުގެ އިސް މުވައްޒަފުންތަކެއް މިއަދު ވަނީ ހަރަކާތްތެރިވެފަ އެވެ.
ފޭދޫގެ ދެ ސަރަހައްދެއްގައި 25 ހައުސިން ޔުނިޓް އިމާރާތްކޮށް ނިމިފައި ހުންނަތާ ތިން އަހަރެއްހާ ދުވަސްވީރު ވެސް، އެ ޔުނިޓްތައް ދޫކުރެވިފައެއް ނެތެވެ.
އަދި މިކަން ދިގުލައިގެން ގޮސްފައި ވަނިކޮށް، އެތަންތަނުން ވައްކަންކޮށް، ބައެއް ޔުނިޓްތަކަށް އެކި ވަރުގެ ގެއްލުންތައް ދީފައިވެ އެވެ.
އެނގިފައިވާ ގޮތުގައި އެކަށީގެންވާ ގޮތަށް ނުބެލެހެއްޓި ވަގުންގެ ފަރާތުން ޔުނިޓްތަކަށް ގެއްލުންތައް ލިބެމުންދާ އިރު، ބައެއް ޔުނިޓްކުގައި ހުރި ފެން މޯޓަރުތަކާއި ކަރަންޓް ކޭބަލްތައް ވެސް ވަނީ ބުރިކޮށްގެން ނަގައިފަ އެވެ.
އަދި ބައެއް ޔުނިޓްތަކުގެ ފުރާޅުން ވާރޭވެހޭކަން ވެސް އެނގިފައިވެ އެވެ.
މި ޔުނިޓްތަކުގެ މިހާރުގެ ހާލަތު ބެލުމަށް ފަހު، ފޭދޫ އަވަށު އޮފީހުން އެކަމާ ގުޅޭ ތަފުސީލްތައް ފޮނުވާނީ ހައުސިން މިނިސްޓްރީއަށެވެ.
ހައުސިން މިނިސްޓަރު ދާދި ފަހުން ވިދާޅުވީ ފޭދޫގައި ހުރި ހައުސިން ޔުނިޓްތައް ދޫކުރުމުގެ ކަންކަން ދެން ކުރިއަށް ގެންދާނީ ސީދާ މިނިސްޓްރީގެ ބެލުމުގެ ދަށުން ކަމަށެވެ.
އަދި ޔުނިޓްތަކަށް އެދުމުގެ ފުރުސަތު ވަރަށް އަވަހަށް ހުޅުވައިލާން މިނިސްޓްރީން ވަނީ ނިންމައިފަ އެވެ.