އަނިލްގެ ކަޕޫރުގެ އަންހެން ދަރިފުޅު ސޯނަމް ކަޕޫރަށް ފަހު ހަގު ފިރިހެން ދަރިފުޅު ހާޝްވަރްދާން ކަޕޫރު މިހާރު އަންނަނީ ބޮޑު ސްކްރީނަށް ނިކުންނަން ތައްޔާރުވަމުންނެވެ.
އޭނާގެ ފުރަތަމަ ފިލްމަކީ "ބާގް މިލްކާ ބާގް" އާއި "ރަންގް ދެ ބަސަންތީ" ފަދަ ބޮޑެތި ބްލޮކްބަސްޓާތައް ޑައިރެކްޓްކޮށްފައިވާ އޯމް ޕްރްކާޝް މެހެރާގެ "މިރްޒާ ސާހިބާން" އެވެ.
މި ފިލްމުގެ ބަތަލަކީ އުމުރުން 22 އަހަރު ހާޝް އެވެ.
ފިލްމަަށް ބަތަލާއަކު ހޯދުމުގެ މަސައްކަތް ވަރަށް އަވަދިނެތި މެހެރާ އަންނަނީ ކުރަމުންނެވެ.
"މިރްޒާ ސާހިބާން" އިން ހާޝް ބޮލީވުޑަށް ނިކުންނަ އިރު، އޭނާ ވަނީ ފިލްމުގައި ދައްކުވައިދޭ ކެރެކްޓާ އަށް ވަރަށް ބޮޑަށް ތައްޔާރުވަމުންނެވެ.
އެގޮތުން މުމްބާއީ ދޫކޮށް އޭނާ މިހާރު ނިއު ދިއްލީގައި އުޅޭތާ ހަތަރު މަސްވެއްޖެ އެވެ. އެތަނުގައި ހާޝް ކުރާހާ ވެސް ކަމަކީ ފިޒިކަލީ އާއި މެންޓަލީ ގޮތުން ވެސް ފިލްމުގެ "މިރްޒާ" ކެރެޓާ ބިލްޑް ކުރުމެވެ.
މިކަމާ މެހެރާ ވެސް ހުރީ ވަރަށް އުފަލުންނެވެ. އޭނާ ބުނީ ހާޝް މިހާރު ފެންނަނީ މީގެ ކުރިން އޭނާ ފެނުނު ގޮތާ މުޅިން ތަފާތުކޮށް ކަމަށެވެ.
"އޭނާ ކެރެކްޓާ އަށް ތައްޔާރުވުމުގައި އެ ކުރާ ހިތްވަރާއި މަސައްކަތް ފެނިފައި އަހަރެން މި ހުރީ ހަމަ ބުނާނެ އެކައްޗެއް ވެސް ނޭނގިފައި،" ހާޝްގެ ދައްތަ ސޯނަމް ހިމަނައިގެން "ދިއްލީ 6" ވެސް ޑައިރެކްޓް ކުރި މެހެރާ ބުންޏެވެ. "ހާޝްއާ އެކު ފިލްމުގެ ޓީމެއް ވެސް ދިއްލީގައި އޭނާ އާ އެކު އެބަ ހަރަކާތްތެރިވޭ. އޭނާއަކީ މަސައްކަތަށް ވަރަށް ޑެޑިކޭޓް ޒުވާނެއްގެ ގޮތުގައި އަހަންނަށް ސިފަ ކުރެވެނީ. އެހެންވެ ބެލުންތެރިންނަށް ފިލްމުން ވަރުގަދަ ކެރެކްޓާއެއް ފެނިގެން ދާނެ ކަމާ ދޭތެރޭ އެއްްވެސް ޝައްކެއް ނެތް."
އަނިލް ކަޕޫރުގެ ތިން ކުދިންގެ ތެރެއިން ދެ ކުއްޖަކު ސްކްރީން ކުރިމައްޗަށް ނިކުތަސް، ރިއާ ކަޕޫރު މަސައްކަތް ކުރަނީ ކެމެރާގެ ފުރަހަގުގަ އެވެ.
އޭނާ ވަނީ ސޯނަމް ހިމަނައިގެން މީގެ ކުރިން "އައިޝާ" ގެ ނަމުގައި ފިލްމެއް ޕްރޮޑިއުސްކޮށްފަ އެވެ.