ދިވެހި ފުލުހުންގެ ޚިދުމަތާއި، އައްޑޫ ސިޓީ ކައުންސިލް އަދި ޒުވާނުންގެ ވުޒާރާއިން ގުޅިގެން އައްޑޫ ސިޓީގައި ބޭއްވުމަށް ހަމަޖެހިފައިވާ ލާމަސީލު ޒުވާނާ ކޭމްޕާގުޅޭ މައުލޫމާތު ސެޝަނެއް، އެމް.އެން.ޔޫ ހިތަދޫ ކެމްޕަހުގައި ކުރިއަށް ގެންގޮސްފިއެވެ.
26 ޑިސެމްބަރުން ފެށިގެން 2 ހަފްތާގެ މުއްދަތަކަށް ކުރިއަށް ގެންދަން ހަމަޖެހިފައިވާ މި ކޭމްޕް ކުރިއަށް ދާނީ އައްޑޫ ހައި ސްކޫލުގައެވެ.
ޒުވާނުންނަކީ ކިޔަމަންތެރި ހަރުދަނާ ސިފަވަންތަ، ޤައުމިއްޔަތާއި ދީނަށް ލޯބިކުރާ، މަސައްކަތު މާޙައުލަށް ޝައުޤުވެރި، މަސައްކަތުގެ އަޚުލާޤު ދަމަހައްޓާ، ނަމޫނާ ބަޔަކަށް ހެދުމުގެ މަޤްޞަދުގައި ކުރިއަށް ގެންދާ މި ކޭމްޕުގައި ޖުމުލަ 130 ބައިވެރިއަކަށް ފުރުޞަތު ދޭ ގޮތަށް ވަނީ ހަމަޖެހިފައެވެ. އަދި 30 ނޮވެމްބަރު 2021ގެ މެންދުރުފަހު 14:00ގެ ކުރިން ބައިވެރިވުމުގެ ފުރުޞަތުވެސް ވަނީ ހުޅުވާލެވިފައެވެ.
މި ކޭމްޕާ ގުޅޭގޮތުން މައުލޫމާތު ދެއްވަމުން ފުލުހުންގެ ކްރައިމް ޕްރިވެންޝަން އެންޑް ޕަބްލިކް އެފެއަރޒްގެ ސަބް އިންސްޕެކްޓަރ އޮފް ޕޮލިސް މުޙައްމަދު ރިޝާން ވިދާޅުވީ، މި ކޭމްޕް ކުރިއަށް ގެންދަން ހަމަޖެހިފައިވަނީ ސްކޫލް ދައުރު ނިމިފައިވާ ޒުވާނުންނަށް ކަމަށާއި، އައްޑޫ ސިޓީން މި ކޭމްޕަށް ބޮޑު ތަރުހީބެއް ލިބޭނެކަމަށް އުންމީދު ކުރާކަމަށެވެ. އަދި އައްޑޫ ސިޓީއަށާއި ފުވައްމުލަށް ސިޓީގެ ޒުވާނުންނަށް މި ފުރުސަތު އެބައޮތް ކަމަށާއި، އަދަދު ހަމަނުވާނަމަ، ގއ. އަދި ގދ. އިންވެސް ބައިވެރިންނަށް ފުރުޞަތު ދޭނެކަމަށް ރިޝާން ވިދާޅުވިއެވެ.
ލާމަސީލު ޒުވާނާ ކޭމްޕުގައި ބައިވެރިވުމުގެ ފުރުޞަތު ހުޅުވާލެވިފައިވަނީ 18 އަހަރާއި 25 އަހަރާ ދެމެދުގެ ޒުވާނުންނަށެވެ. އަދި ކޭމްޕުގެ މުއްދަތުގައި ބައިވެރިންގެ ކެއިންބުއިންގެ ޚަރަދުތައްވެސް ބަލަހައްޓާނީ ދިވެހި ފުލުހުންގެ ޚިދުމަތުންނެވެ. އަދި ކޭމްޕްގެ ބައިވެރިންނަށް ބޭނުންވާ ފޮތާއި، ގަލަމާއި އަދި މިނޫންވެސް ސާމާން ފޯރުކޮށްދޭނީ އެ ޚިދުމަތުންނެވެ.
މި ކޭމްޕުގައި ބައިވެރިވުމަށް އެއްވެސް ފީއެއް ނުނަގާނެއެވެ. އަދި މި ކޭމްޕުގައި ބައިވެރިވުމަށް އެދޭ ފޯމް https://forms.gle/sj8d7a7F1jpNbpV68 ލިންކުންނާއި މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، މާފަންނު އިޖުތިމާޢީ މަރުކަޒު، އައްޑޫ ސިޓީ ކައުންސިލް އިދާރާ އަދި ފުވައްމުލަކު ސިޓީ ކައުންސިލް އިދާރާއިންނާއި، ދެކުނު އަތޮޅުތަކުގައި ޤާއިމްކުރެވިފައިވާ އިޖުތިމާޢީ މަރުކަޒުތަކުން ލިބެން ހުންނާނެކަމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އިން ވިދާޅުވެއެވެ.