މަތީ ސާނަވީ ދަރިވަރުންގެ އޭލެވެލް އިމްތިހާން އޮކްޓޯބަރ/ނޮވެމްބަރއަށް ބަދަލުކޮށްފިއެވެ.
މިއާއެކު މިހާރު އޭލެވެލް ކިޔަވަމުންދާ ދަރިވަރުން 2022 ވަނަ އަހަރުގެ މެއި/ޖޫންގައި ހަދަން ހަމަޖެހިފައިވާ އިމްތިހާންތައް 2022 އޮކްޓޯބަރ/ނޮވެމްބަރއަށް ވަނީ ބަދަލުކުރެވިފައެވެ. އަދި މި ނިންމުމާއެކު 2019 ވަނަ އަހަރު އޭލެވެލް ފެށި ދަރިވަރުންނާ އެއްގޮތަށް 2020 ވަނަ އަހަރު އޭލެވެލް ފެށި ދަރިވަރުން ވެސް އޭލެވެލް ނިމޭނީ 3 އަހަރު ދުވަހުންނެވެ.
އެޑިއުކޭޝަން މިނިސްޓްރީން ސްކޫލްތަކަށް ފޮނުއްވާފައިވާ ސާކިއުލާގައި ބުނެފައިވަނީ، ދިރާސީ އަހަރު މެއި/ޖޫންގައި ފެށުމުން ސްކޫލްތަކަށް ދަރިވަރުން އިމްތިހާނަށް ތައްޔާރުކުރުމަށް ދަތިތަކެއް ކުރިމަތިވާކަމަށެވެ. އަދި މެއި/ޖޫންގައި އިމްތިޙާން ހަދާނަމަ ގައިޑެޑް ލާރނިންގެ ގޮތުގައި ދަރިވަރުންނަށް ބޭނުންވާ 180 ގަޑިއިރު ހަމަ ކުރުމަށް ދަތިވާކަންވެސް ފާހަގަކޮށްފައިވެއެވެ. އެހެންކަމުން ސުކޫލްތަކާ މަޝްވަރާ ކުރުމަށްފަހު މި ބަދަލު ގެންނަން ނިންމީކަމަށް ސާކިއުލާގައި ފާހަގަކޮށްފައިވެއެވެ.
މީގެ ކުރިން މިނިސްޓްރީ އޮފް އެޑިއުކޭޝަނުން ވަނީ ގްރޭޑް 11 ގައި ހަދާ އެޑެކްސެލް އޭއެސް އިމްތިހާނުވެސް އޮކްޓޯބަރ/ނޮވެމްބަރއަށް ފަސްކޮށްފައެވެ.