ހުކުރު މިސްކިތަށާއި އިސްލާމީ މަރުކަޒަށް ކުޑަކަމު ދިޔަ މިހާއަށް ދައުވާ ކޮށް މައްސަލައިގެ އަޑުއެހުންތައް ފަށައިފިއެވެ.
ޕީޖީ އޮފީހުން ބުނެފައިވަނީ މ. ޝޭޑީހޯމް, ޙަސަން ޒިޔާދު 03 އޮކްޓޫބަރު ވަނަދުވަހުގެ އެކިވަގުތުތަކުގައި ރައީސްއޮފީސް ދޮރު މައްޗަށާއި ހުކުރުމިސްކިތަށާއި އިސްލާމީ މަރުކަޒުތެރޭގެ އިތުރުން ޖުމްހޫރީ މައިދާނަށް ގަސްތުގައި ކުޑަކަމުދިޔަކަމަށް ތުހުމަތުކުރެވޭ މައްސަލައިގައި 16 ނޮވެމްބަރު ދުވަހު ދައުވާކުރުމަށް ކްރިމިނަލް ކޯޓަށް ހުށަހަޅަފައިވާކަމަށެވެ.
އެ މައްސަލައިގައި އޭނާގެ މައްޗަށް ކޮށްފައިވާ ދައުވާގެ އަޑުއެހުމެއް މިއަދު ކްރިމިނަލް ކޯޓުގައިވެސް ވަނީ ބާއްވާފައެވެ. އަދި އެ އަޑުއެހުމުގައި ޒިޔާދު ވަނީ އޭނާގެ މައްޗަށް ކޮށްފައިވާ ދެ ދައުވާއަށްވެސް އިއުތިރާފު ވެފައެވެ.
ޒިޔާދުގެ މައްޗަށް ދައުވާކޮށްފައިވަނީ ދިވެހިރާއްޖޭގެ ޤާނޫނުލްޢުޤޫބާތުގެ 615 ވަނަ މާއްދާގެ (ހ) ގެ (3) ވަނަ ނަމްބަރާ ޙަވާލާދީ، އެ މާއްދާގެ (ށ) ގެ ދަށުން، އާންމު މަސްލަހަތަށް ގެއްލުންހުރި އަމަލެއްކުރުމުގެ ކުށުގެ ދެ ދައުވާއެވެ.
މިސްކިތަށް ކުޑަކަމު ދިޔަ މައްސަލައިގައި ޒިޔާދުގެ މައްޗަށް ދައުވާ ކޮށްފައިވާއިރު، މިހާރު އޭނާ ބަންދުގައި ހުރީ ހަތިމަށް ކުޅުޖެހި މައްސަލައިގައެވެ. މިއީ އެ މައްސަލައިގައި އޭނާގެ ބަންދުގެ މުއްދަތު ޖެހި ތިން ވަނަ ފަހަރެވެ.