އަންނާރު ޖޫހަކީ ހިތުގެ ބައްޔަށާއި އުރަވަޅީގެ ކެންސަރަށް ވަރަށް ރަނގަޅު ފަރުވާއެއް ކަމަށް ޔުނިވަސިޓީ އޮފް ކެލިފޯނިއާގެ ސައިންސްޓިސްޓުން ކުރި ދިރާސާއަކުން ދައްކައިފި އެވެ.
އަދި ކޮންމެ ދުވަހަކު އަންނާރު ޖޫސް ތައްޓެއް ބޯނަމަ ފިރިހެނުން ޖިންސީ ބަލިކަށިކަމުގެ ފަރުވާއަކަށް ބޭނުންކުރާ ވިއެގްރާ ބޭހަށް ވުރެ މާރަނގަޅު ފައިދާއެއް ކުރާ ކަމަށް ވެސް މި ދިރާސާ ރިޕޯޓު ބުނެ އެވެ.
މިގޮތުން މި ދިރާސާ ކުރުމަށް 53 ފިރިހެނަކަށް އެއް މަސް ދުވަސް ވަންދެން ކޮންމެ ދުވަހަކު އަންނާރު ޖޫސް ތައްޓެއް ދީފައި ވެ އެވެ.
މި މީހުންގެ ތެރެއިން ދެބައިކުޅަ އެއްބައި މީހުން ބުނެފައިވަނީ އަންނާރު ޖޫހުން އެ މީހުންނަށް ފައިދާކުރި ކަމަށެވެ.
އަންނާރު ޖޫހަކީ އެންޓިއޮކްސިޑަންޓް އިން މުއްސަނދިވެފައިވާ އެއްޗެކެވެ. މި އެންޓިއޮކްސިޑަންޓަކީ ލޭގައި ދައުރުވާ ވިހަތައް ނައްތާލައި، ލޭ ސާފުކޮށްދޭ އެއްޗެކެވެ. އެހެންކަމުން މީގެ ސަބަބުން ޖިންސީ ގުނަވަންތަކަށް ލޭ ސަޕްލައިކޮށްދޭ މިންވަރު އިތުރު ވަނީ އެވެ.
އުރަވަޅީގެ ކެންސަރު ޖެހިފައިވާ މީހުންނަށް ދުވާލަކު އަށް އައުންސް އަންނާރު ޖޫސް ދޭނަމަ ބަލި ބޮޑުވުން ހަތަރުގުނަ ދަށްކުރެވޭ ކަމަށް މީގެ ކުރިން ވެސް ސައިންސްވެރިން ވިދާޅުވެފައި ވެ އެވެ.
އަދި މި ބަލި ޖެހިފައިވާ އުމުރުން 60 އަހަރާއި 75 އަހަރާ ދެމެދުގެ މީހުންނަށް އަންނާރު ޖޫސް ދޭނަމަ އިތުރު ބޭހެއް ބޭނުން ނުކޮށް ސިއްހީ އިތުރު މައްސަލަތަކާ ކުރިމަތިނުވެ ދުނިޔޭގައި އުޅުމުގެ ފުރުސަތު ލިބޭ ކަމަށް ދައްކަ އެވެ.
އަދިވެސް މި ދިރާސާ ކުރެއްވި ބޭފުޅުން ފާހަގަ ކުރެއްވި ގޮތުގައި ކޮންމެ ދުވަހަކު އަންނާރު ޖޫސްތައްޓެއް ދޭން ފެށުމުން ކެންސަރު ސެލްތައް ޑަބަލްވާ މުއްދަތު 54 މަހަށް ދިގުވެގެން ދިޔަ އެވެ. އަދި މި ޖޫހުން އުރަވަޅީގެ ކެންސަރުސެލްތައް މަރުވަމުންދާކަމުގެ ހެކި ވެސް ލިިބިފައިވާ ކަމަށް އެ ބޭފުޅުން ވިދާޅުވެ އެވެ.