ދިވެހި ފުލުހުންގެ ޚިދުމަތާއި، އައްޑޫ ސިޓީ ކައުންސިލް އަދި ޒުވާނުންގެ ވުޒާރާއިން ގުޅިގެން އައްޑޫ ސިޓީގައި ބޭއްވުމަށް ހަމަޖެހިފައިވާ ލާމަސީލު ޒުވާނާ ކޭމްޕާގުޅޭ މައުލޫމާތު ސެޝަނެއް، މިރޭ ހުޅުދޫ-މީދޫގައި ކުރިއަށް ގެންދަން ނިންމައިފިއެވެ.
މި މައުލޫމާތު ސެޝަން އޮތީ މިރޭ 8:00 ގައި ސ.އަތޮޅު މަދަރުސާގައެވެ. މިކަމާއި ގުޅޭގޮތުން ދިވެހި ފުލުހުންގެ ޚިދުމަތުން ވިދާޅުވީ، މި ކޭމްޕުގެ މައުލޫމާތު ސެޝަންތައް ޏަވިޔަނި އަތޮޅުގައިވެސް ކުރިއަށް ގެންދާނެކަމަށެވެ.
ޒުވާނުންނަކީ ކިޔަމަންތެރި ހަރުދަނާ ސިފަވަންތަ، ޤައުމިއްޔަތާއި ދީނަށް ލޯބިކުރާ، މަސައްކަތު މާޙައުލަށް ޝައުޤުވެރި، މަސައްކަތުގެ އަޚުލާޤު ދަމަހައްޓާ، ނަމޫނާ ބަޔަކަށް ހެދުމުގެ މަޤްޞަދުގައި ކުރިއަށް ގެންދާ މި ކޭމްޕުގައި ޖުމުލަ 130 ބައިވެރިއަކަށް ފުރުޞަތު ދޭ ގޮތަށް ވަނީ ހަމަޖެހިފައެވެ. އަދި 30 ނޮވެމްބަރު 2021ގެ މެންދުރުފަހު 14:00ގެ ކުރިން ބައިވެރިވުމުގެ ފުރުޞަތުވެސް ވަނީ ހުޅުވާލެވިފައެވެ.
ލާމަސީލު ޒުވާނާ ކޭމްޕުގައި ބައިވެރިވުމުގެ ފުރުޞަތު ހުޅުވާލެވިފައިވަނީ 18 އަހަރާއި 25 އަހަރާ ދެމެދުގެ ޒުވާނުންނަށެވެ. އަދި ކޭމްޕުގެ މުއްދަތުގައި ބައިވެރިންގެ ކެއިންބުއިންގެ ޚަރަދުތައްވެސް ބަލަހައްޓާނީ ދިވެހި ފުލުހުންގެ ޚިދުމަތުންނެވެ. އަދި ކޭމްޕްގެ ބައިވެރިންނަށް ބޭނުންވާ ފޮތާއި، ގަލަމާއި އަދި މިނޫންވެސް ސާމާން ފޯރުކޮށްދޭނީ އެ ޚިދުމަތުންނެވެ.
މި ކޭމްޕުގައި ބައިވެރިވުމަށް އެއްވެސް ފީއެއް ނުނަގާނެއެވެ. އަދި ގޫގުލް ފޯމެއްގެ ޒަރިއްޔާއިން މި ކޭމްޕުގައި ބައިވެރިވާން ފޯމު ހުށަހެޅޭނެއެވެ.