އައްޑޫގައި ކޮވިޑް-19 ފެތުރުން ކޮންޓްރޯލް ކުރުމަށް އިތުރު ފިޔަވަޅުތަކެއް އެޅުމަށް މަޝްވަރާކޮށްފިއެވެ.
އައްޑޫ ޓާސްކު ފޯސްއިން ވަނީ ޕްރީ ސްކޫލް އަދި ގްރޭޑް 1 އިން 3 އަށް ސްކޫލް ބަންދުކޮށް އޮންލައިންކޮށް ކިޔަވައިދިނުމާއި، ގާޑިޔާތައް ބަންދުކޮށް ޓޭކްއަވޭ ހިދުމަތް ދިނުމުގެ އިތުރުން ކުޅިވަރު މުބަރާތައް ހުއްޓާލަން މަޝްވަރާކޮށްފައެވެ. މީގެ އިތުރުން، ޒުވާނުންގެ މަރުކަޒުތަކުގެ ހިދުމަތް މެދުކަނޑާލުމާއި، ހަފްލާތައް ބޭއްވުން މަޑުޖައްސާލަން ޓާސްކުފޯސް އިން ވަނީ ނިންމާފައެވެ. ނަމަވެސް، އެޗް.ޕީ.އޭގެ ލަފާއާއެކު މި ފިޔަވަޅުތަކަށް ބަދަލުއައުން އެދެވިގެންވެއެވެ.
އައްޑޫގެ ކޮވިޑު ހާލަތާއި ގުޅޭގޮތުން އައްޑޫ ޓާސްކުފޯސްއިން ނިންމި ނިންމުން އައްޑޫ ސިޓީ ކައުންސިލާ ހިއްސާ ކުރެވިފައިވާއިރު، ފިޔަވަޅު އަޅައިދިނުމަށް އެދި އެޗްޕީއޭއަށް ވަނީ ފޮނުވާފައެވެ.
އައްޑޫގައި ކޮވިޑްގެ ހާލަތު ގޯސްވެފައިވާއިރު، އައްޑޫގެ އަވަށްތަކުގެ ތެރެއިން އެންމެ ގިނަ އަދަދަކަށް ކޮވިޑްގެ އެކްޓިވް ކޭސް ފެންނަނީ ހިތަދޫ އަވަށުންނެވެ. އެގޮތުން ހިތަދޫގައި ކޮވިޑްގެ 170 ކޭސް އުޅޭއިރު، މަރަދޫގައި 43 ކޭސް، ފޭދޫގައި 27 ކޭސް، މަރަދޫފޭދޫގައި ހަތަރު ކޭސް، މީދޫގައި 39 ކޭސް އަދި ހުޅުދޫގައި ފަސް ކޭސް އުޅޭ ކަމަށް އައްޑޫ އެމަޖެންސީ އޮޕަރޭޝަންސް ސެންޓަރުން ހާމަކުރެއެވެ.
މިއާއެކު އައްޑޫގެ މުޅި ޖުމްލަ އެކްޓިވް ކޭސްގެ އަދަދު ވަނީ 290 އަށް އަރާފައެވެ. މިވަގުތުވެސް އައްޑޫ ކޮވިޑް ފެސިލިޓީގައި ހަތަރު މީހަކަށް ފަރުވާ ދެމުންދާއިރު، މި ބަލީގައި އައްޑޫ އިން 11 މީހަކު ވަނީ ނިޔާވެފައެވެ.