އެކުވެރި ސުވާދީބު ޕާޓީގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދަނުދޭން އިލެކްޝަންސް ކޮމިޝަނުން ނިންމައިފިއެވެ.
އެކުވެރި ސުވާދީބު ޕާޓީ އުފެއްދުމުގެ ހުއްދަ އިލެކްޝަންސް ކޮމިޝަނުން ދީފައިނުވަނީ، ސިޔާސީ ޕާޓީގެ ގާނޫނުގެ 14 ވަނަ މާއްދާގެ (ށ) އާ ޚިލާފުވާތީއެވެ. އެގޮތުން އިލެކްޝަންސް ކޮމިޝަނުން ބުނީ، ސިޔާސީ ޕާޓީއެއްގެ ނަމުގައި، މީހެއްގެ އަމިއްލަ ނަން ނުވަތަ ވަނަން ނުވަތަ ދިވެހިރާއްޖޭގެ ވަކި ސަރަހައްދަކަށް ނުވަތަ ވަކި އަތޮޅަކަށް ނުވަތަ ވަކި ރަށަކަށް ނުވަތަ ވަކި އަވަށަކަށް ކިޔާނަން ހިމަނައިގެން ނުވާނޭކަމަށެވެ.
މީގެ އިތުރުން އިލެކްޝަންސް ކޮމިޝަނުން ބުނީ، އެކުވެރި ސުވާދީބު ޕާޓީއަކީ ރާއްޖޭގެ ވަކި ސަރަހައްދަކަށް ނިސްބަތްކުރެވޭ ނަމަކަށްވާތީ، އެ ނަމަކީ ސިޔާސީ ޕާޓީއަކަށް ކިޔުން އެކަށީގެންވާ ނަމެއްކަމަށް ނުދެކޭކަމަށެވެ. އެހެންކަމުން، އެކުވެރި ސުވާދީބު ޕާޓީ އުފެއްދުމުގެ ހުއްދަ ދެވެން ނެތްކަމަށް، އިލެކްޝަންސް ކޮމިޝަނުގެ ރައީސް ފުއާދު ތައުފީޤް ސޮއިކުރައްވާ، ޕާޓީ އުފައްދަން އެދުނު މުހައްމަދު ޔާސީނަށް ވަނީ ސިޓީ ފޮނުވާފައެވެ.
"ސުވާދީބު"ގެ ލަފްޒީ މާނައަކީ، ރާއްޖޭގެ އެންމެ ދެކުނުގެ ހަތަރު އަތޮޅެވެ. މީގެ ކުރިން މި ހަތަރު އަތޮޅުން ވަނީ، މާލެއާ ވަކިވެ، އަމިއްލަ ދައުލަތެއްވެސް އުފައްދާފައެވެ. އޭރު އެ ދައުލަތަށް ކިޔާފައިވަނީ ޔުނައިޓެޑް ސުވައިދީބު ރިޕަބްލިކެވެ.