ހެލްތު ޕްރޮޓެކްޝަން އޭޖެންސީ (އެޗް.ޕީ.އޭ) ގެ ރަސްމީ ބަހެއް ނުލިބުމުގެ ސަބަބުން އައްޑޫ ސިޓީ ކައުންސިލްގެ ޕްރެސް ކޮންފަރެންސް ކެންސަލްކޮށްފިއެވެ.
އައްޑޫގެ ކޮވިޑް ހާލަތު ކޮންޓްރޯލްނުވެ، އިތުރު ފިޔަވަޅުތައް އަޅަން ނިންމާފައި އޮތުމާއި ގުޅިގެން މިރޭގެ ވަގުތެއްގައި ޕްރެސްއެއް ބާއްވާނެކަމަށް އައްޑޫސިޓީގެ މޭޔަރު އަލީ ނިޒާރު ވަނީ ވިދާޅުވެފައެވެ.
ނަމަވެސް ކައުންސިލްގެ މީޑިއާއިން ވަނީ އެޗް.ޕީ.އޭގެ ބަހެއް ނުލިބުމުގެ ސަބަބުން މި ޕްރެސް ކޮންފަރެންސް ކެންސަލްވެފައިވާ ކަމަށް ބުނެފައެވެ. މީގެ އިތުރުން ކައުންސިލް މީޑިއާއިން ވިދާޅުވީ، އެޗް.ޕީ.އޭގެ ޖަވާބެއް ލިބުމުން ފަހުން ތާރީޚެއްގައި ޕްރެސް ކޮންފަރެންސް ބޭއްވިގެންދާނެ ކަމަށެވެ.
ފިޔަވަޅުތައް ތަންފީޒުކުރަން ފަށާނެ ދުވަހަކާމެދު އަދި ގޮތެއް ނުނިންމަވާކަމަށް އައްޑޫ ސިޓީގެ މޭޔަރު ވަނީ ވިދާޅުވެފައެވެ. އަދި މިހާރު އަޅާފައިވާ ފިޔަވަޅުތަކަށް ބަދަލު ގެންނަން މަޝްވަރާކުރަމުން އައި ކަމަށާއި، ބަދަލެއް ނުގެނެވި އޮތުމުން މީގެ ކުރިން ޕްރެސް ނުބޭއްވި ދިޔައި ކަމަށްވެސް މޭޔަރު ވަނީ ވިދާޅުވެފައެވެ.
އައްޑޫގެ ކޮވިޑް ހާލަތު ގޯސްވެ، އިތުރު ފިޔަވަޅުތަކެއް އަޅަން ޓާސްކް ފޯހުން ވަނީ އެޗް.ޕީ.އޭއަށް ރެކޮމެންޑް ކޮށްފައެވެ. ނަމަވެސް އެޗް.ޕީ.އޭގެ ޖަވާބެއް ނުލިބުމުގެ ސަބަބުން ކައުންސިލުން އެ ފިޔަވަޅުތައް ރަސްމީކޮށް އިއުލާންކޮށްފައެއް ނުވެއެވެ.