ސްރީލަންކަން އެއަރލައިންސްގެ ދަތުރުތައް އައްޑޫ އިންޓަރނޭޝަނަލް އެއަރޕޯޓަށް ފެށުމާއެކު، ކަނެކްޓިންގ ފްލައިޓް މެދުވެރިކޮށް ދުބާއީ އަދި ފްރާންސް ފަދަ ގައުމުތަކަށް ދަތުރުކުރާ ގޮތަށް ހަމަޖެހިއްޖެއެވެ.
ޑިސެމްބަރު 4 ވަނަ ދުވަހުން ފެށިގެން ގަމުން ލަންކާއަށް ދަތުރުތައް ފެށުމާއެކު، ޔޫރަޕާއި މެދުއިރުމަތީގެ ގައުމުތަކާ އައްޑޫ ގުޅުވާލެވޭނެއެވެ. އެގޮތުން، ގަމުން ނޭޕާލަށް، ޖަރުމަނަށް، ޕެރިހަށް އަދި ދުބާއިއަށް ސްރީލަންކަންގެ ކަނެކްޓިންގ ދަތުރުތައް ގަމުން އޮންނާނެކަމަށް އޭސް ޓްރެވެލްސް އިން ވަނީ ބުނެފައެވެ.
އޭސް ޓްރެވެލްސްގެ މެނޭޖިންގ ޑިރެކްޓަރ މުހައްމަދު ފިރާޤު ވިދާޅުވީ، ކުރިން ދަތުރުތައް ކުރިއަށް ގެންދިޔައިރު ބޮޑަށް އަމާޒުކުރީ ޗައިނާގެ މާކެޓަށް ކަމަށާއި، ނަމަވެސް މިހާރު ބަދަލަކާއެކު ޔޫރަޕުގެ މާކެޓަށް އަމާޒުކޮށްފައިވާ ކަމަށެވެ. މީގެ އިތުރުން ފިރާޤު ވިދާޅުވީ، މާލެއިން ޔޫރަޕަށް ކުރާ ދަތުރުތަކަށްވުރެ ގަމުން ކުރާ ދަތުރުތަކުގެ އަގުހެޔޮވާނެ ކަމުގެ ޔަގީންކަން އެބައޮތް ކަމަށެވެ.
އައްޑޫއިން ކޮލަމްބޯއަށް ސްރީލަންކަން އެއަރލައިންސްގެ ދަތުރުތައް އޮންނާނީ ހަފްތާއަކު އެއް ފަހަރެވެ. ގަން-ކޮލަމްބޯ ދެކޮޅު ޓިކެޓްގެ އަގު އުޅެނީ 4,158 ގައެވެ. އަދި ގަން-ދުބާއި ދަތުރުގެ އަގުތައް އުޅެނީ 7,484.40 ގައެވެ. އިތުރު މަންޒިލުތަކަށް ދަތުރުކުރާ އަގުތައްވެސް ހެޔޮވާނެކަމަށް އޭސް ޓްރެވެލްސް އިން ވަނީ ބުނެފައެވެ.
މި ދަތުރުތަކާގުޅޭ އިތުރު މައުލޫމާތު 7926087 ނަންބަރުން ލިބޭނެކަމަށް އޭސް ޓްރެވެލްސް އިން ވަނީ ބުނެފައެވެ.