މާލެ ސިޓީ ކައުންސިލްގެ 4 ވަނަ ދައުރަށް 6 މަސް ފުރުން ރޭ ފާހަގަކޮށްފިއެވެ.
މާލެ ސިޓީ ކައުންސިލް ރީބްރޭންޑްކުރުމަށް ބޭއްވި މި ހަފްލާގަައި، އެ ކައުންސިލްގެ އައު ދިދައާއި، ލޯގޯ، އަދި އައު ޔުނިފޯމް ވަނީ ތައާރަފްކޮށްފައެވެ.
މާލެ ސިޓީ ކައުންސިލްގެ އައު ލޯގޯއިން ރަމްޒުކޮށްދެނީ އެ ސިޓީގެ ހަ އަވަށެވެ. އެގޮތުން، ލޯގޯގެ މެދުން މާލޭގެ 4 އަވަށްކަމަށްވާ މާފަންނު، މައްޗަންގޮޅި، ގަލޮޅު އަދި ހެންވޭރު ރަމްޒުކޮށްދެއެވެ. މީގެއިތުރުން، ލޯގޯގެ ދެ ފަރާތުން ވިލިމާލެއާއި ހުޅުމާލެ ރަމްޒުކޮށްދޭކަމަށް އެ ކައުންސިލުން ބުނެއެވެ. ހަމައެހެންމެ، އައު ލޯގޯގެ މެދުގައި ބޭނުންކޮށްފައިވާ ކުލަތަކަކީ، މާލޭގެ 4 އަވަށުގެ ކުލަތައް ކަމަށާއި، ދެ ފަރާތުން ފެންނަ ކުލަތަކަކީ ހުޅުމާލެއާއި ވިލިމާލެއަށް ނިސްބަތްވާ ކުލަތައް ކަމަށް، އެ ކައުންސިލުން ވަނީ ބުނެފައެވެ.
ލޯގޯގައިވާ ރޮނގުތަކުން މާލޭގެ އަވަށްތަކުގެ އެއްބައިވަންތަކަން ރަމްޒުކޮށްދޭނެކަމަށާއި، އާ ލޯގޯ ފަރުމާކޮށްފައިވަނީ ދިވެހި ވެރިކަމުގެ ނިޝާން އަސްލަކަށް ބަލައިގެންކަމަށް މާލެ ސިޓީ ކައުންސިލުން ބުނެއެވެ. މި ލޯގޯއާއެކު، އެ ސިޓީ ކައުންސިލްގެ ތަސައްވުރަކީ ހުރިހައި ޕްލެޓްފޯމެއްގައިވެސް މާލޭގެ 6 އަވަށް ރަމްޒުކޮށްދިނުމެވެ.
މާލެ ސިޓީ ކައުންސިލްގެ ލޯގޯގައި މީގެކުރިން ހުރީ ހުކުރު މިސްކިތުގެ މުންނާރެވެ. މިހާރު ބޭނުންކުރާ ލޯގޯގައިވާ ކުލަތައް އެކުލަވާލަން ބޭނުންކޮށްފައިވާނީ، އިހުޒަމާނުގައި ވެރިކަމުގެ ސިއްކައިގެ ފަރުމާގައި ބޭނުންކޮށްފައިވާ ދުވާ ރޮނގެެއް ކަމަށް، އެ ސިޓީގެ ކައުންސިލުން ބުނެއެވެ.