މިދިޔަ ހުކުރު ދުވަހަކީ އުންމީދީ ދެ ފިލްމެއް ބެލުންތެރިންނާ ހަމައަށް އައި ދުވަހެކެވެ.
އޭގެ ތެރެއިން އެއް ފިލްމަކީ ގިނަ ދުވަސްތަކެއްގެ މެދުކެނޑުމަަކަށް ފަހު ކުޅަދާނަ ބަތަލާ މަދޫރީ ޑިކްޝިޓް ބޮޑު ސްކްރީނަށް އެނބުރި އައި ފިލްމް "ދޭޅް އިޝްގިޔާ" އެވެ.
މި ފިލްމަކީ ނަސީރުއްދީން ޝާހާއި އަރްޝަދު ވަރުސީ އަދި ވިދިޔާ ބާލަން ލީޑް ރޯލް ކުޅުނު "އިޝްގިޔާ" ގެ ސީކްއެލްއެކެވެ.
އަބިޝެކް ޗޯބޭ ޑައިރެކްޓް ކުރި މި ފިލްމްގެ ސީކްއެލް "ދޭޅް އިޝްގިޔާ" މަދޫރީ އާ އެކު އަންނާތީ ފިލްމާ ދޭތެރޭ ކުރެވުނު އުންމީދުތައް ހުރީ ވަރަށް އުހުގަ އެވެ.
"ދޭޅް އިޝްގިޔާ" އާ އެކު ރިލީޒްވި އަނެއް ފިލްމަކީ މުޅިން އާ ތަރިން ހިމަަނައިގެން ޒުވާނުންނަށް އަމާޒުކޮށްގެން ކުރީގެ ބަތަލާއެއް ކަމަށްވާ ދިވްޔާ ކޯސްލާ ކުމާރް ގެނެސް ދިން އޭނާގެ ފުރަތަމަ ޑައިރެކްޝަން "ޔާރިޔާން" އެވެ.
މި ފިލްމް ޕްރޮޑިއުސް ކުރީ ދިވްޔާގެ ފިރިމީހާ އަދި ޓީ-ސީރީސްގެ ވެރިޔާ ބުޝާން ކުމާރެވެ.
ޖެނުއަރީ 10 ވަނަ ދުވަހު "ދޭޅް އިޝްގިޔާ" އާއި "ޔާރިޔާން" ރިލީޒްވި އިރު، މި ފިލްމުތަކުގެ ޓްރެއިލާތަކާއި ޕްރޮމޯޝަނަށް ކުރި ގިނަ މަަސައްކަތުގެ ސަބަބުން ދެ ފިލްމަށް ވެސް ބޮކްސް އޮފީހުގައި ރަނގަޅު ކާމިޔާބީއެއްް ލިބޭނެ ކަމަށް ގަބޫލް ކުރެވެ އެވެ.
އެގޮތުން ދެ ފިލްމް ވެސް ރިލީޒްކޮށް މިހާތަނަށް އައި އިރު، ބޮކްސް އޮފީހުގެ ވިޔަފާރި ރިޕޯޓަށް ބަލާ އިރު މަދޫރީގެ "ދޭޅް އިޝްގިޔާ" އަށް ވުރެ "ޔާރިޔާން" ކާމިޔާބެވެ. މި ފަހަރެއްގައި ބެލުންތެރިންނަށް ސަޕްރައިޒަކަަށް ވެސް ވެދާނެ އެވެ.
އެކަމަކު ހަގީގަތަކީ ދެ ފިލްމް ވެސް މިހާރު ޝޯތައް ދަައްކަމުން އަންނަ އިރު، މިހާތަނަށް "ޔާރިޔާން" ވަނީ ބޮކްސް އޮފީހުގައި 19.2 ކްރޯޑް ރުޕީސްގެ ވިޔަފާރިކޮށްފަ އެވެ.
"ދޭޅް އިޝްގިޔާ" އަށް މިހާތަނަށް ލިބިފައި ވަނީ އެންމެ 12 ކްރޯޑް ރުޕީސް އެވެ.
މުޅިން އާ ތަރިންތަކެއް ފެނުނު "ޔާރިޔާން" އަށް ލިބެމުންދާ ކާމިޔާބީ އާ ބެހޭ ގޮތުން މަޝްހޫރު ފިލްމް ކްރިޓިކް ތަރަން އަދާޝް ބުނީ އެ ފިލްމަކީ މުޅިން އާ ތަރިން ހިމަނައިގެން ނެރުނު ފިލްމުތަކުގެ ތެރެއިން މިހާތަނަށް، ރިލީޒް ކުރި ފުރަތަމަ ދެތިން ދުވަހު އެންމެ ރަނގަޅަށް ވިޔަފާރިވި ފިލްމު ކަމަށެވެ.
ފާހަގަކޮށްލެވޭ ކަމަކީ ދެ ފިލްމު ވެސް ބޮކްސް އޮފީހުގައި ކާމިޔާބް ޝޯތަކެއް ދައްކަމުން އަންނަ އިރު، ކްރިޓިކުންގެ ތައުރީފް ދެ ފިލްމަށް ވެސް ވަރަށް ބޮޑަށް ލިބިފައިވާ ކަމެވެ.
އެކަމަކު ބައެއް ކްރިޓިކުން ވަނީ "ޔާރިއާން" އަކީ ފަރަހް ހާންގެ "މޭ ހޫނާ" އާއި ކަރަން ޖޯހަރުގެ "ސްޓޫޑަންޓް އޮފް ދި އިޔާ" އާ ވަރަށް އެއްގޮތް ކަންތައްތަކެއްް ހުރި ފިލްމެއްކަން ފާހަގަކޮށްފަ އެވެ.
"ދޭޅް އިޝްގިޔާ" އާއި "ޔާރިޔާން" އަށް ވެސް ގިނަ ކްރިޓިކުން ވަނީ ފަހެކުން ހަތަރު ތަރީގެ ރޭޓެއް ދީފަ އެވެ.
އަންނަ ހުކުރު ދުވަހު އަނެއްކާ ވެސް މުޅިން އާ ދެ ތަރިއަކު ބޮލީވުޑަށް ތައާރަފްވާ ފިލްމެއް ރިލީޒް ވާނެ އެވެ.
އެއީ މަޝްހޫރު ޑައިރެކްޓަރު ސުނީލް ދަރްޝަންގެ ފިރިހެން ދަރިފުޅު ޝިވް ދަރްޝަން އާއި 2011 ގެ ފެމިނާ މިސް އިންޑިއާ އާތު ހާސިލް ކުރި ހާސްލީން ކޯރް ލީޑް ރޯލް ކުޅޭ "ކަރްލޭ ޕިޔާރް ކަރްލޭ" އެވެ.
މި ފިލްމް ޑައިރެކްޓްކޮށްފައި ވަނީ ރާޖޭޝް ޕާންޑޭ އެވެ.