އައްޑޫސިޓީގެ ފިޔަވަޅުތައް އިތުރަށް ހަރުދަނާ ކުރުމަށް އައްޑޫ ސިޓީ ކައުންސިލާ ވާހަކަދެކެވެމުން އަންނަކަމަށް ހެލްތު ޕްރޮޓެކްޝަން އޭޖެންސީގެ މެޑިކަލް އޮފިސަރ ޑރ.ނަޒްލާ ވިދާޅުވެއްޖެއެވެ.
އައްޑޫސިޓީގައި އަޅާފައިވާ ފިޔަވަޅުތަކާގުޅޭ ގޮތުން ނޫސްވެރިއަކު ދެންނެވި ސުވާލަކަށް ޖަވާބުދެއްވަމުން ޑރ.ނަޒްލާ ވިދާޅުވީ، ކުރިއަށް އޮތް ތަނުގައި އައްޑޫގައި އިތުރު ފިޔަވަޅުތައް އެޅުން އެކަށީގެންވާ ކަމަށެވެ. މީގެއިތުރުން ނަޒްލާ ވިދާޅުވީ، މިހާރު އަޅާފައިވާ ފިޔަވަޅުތައް ތަންފީޒުކުރުމާއި، ރެސްޕޮންސްގައި ކުރަންޖެހޭ ކަންކަންވެސް އިތުރަށް ރަނގަޅުކުރުމަށް ކައުންސިލާއި، ޓާސްކްފޯހާއި، ހޮސްޕިޓަލާއެކު އެޗް.އީ.އޯ.ސީ އިން އަންނަނީ މަސައްކަތްކުރަމުން ކަމަށެވެ. އަދި ކައުންސިލާއި، ހޮސްޕިޓަލް އަދި ޓާސްކްފޯހުގެ މަސައްކަތުގައި އެހީތެރިވުމަށް ބައެއްކަހަލަ ސަޕޯޓްތައް ދެމުން އަންނަކަމަށްވެސް ޑރ.ނަޒްލާ ވަނީ ވިދާޅުވެފައެވެ.
އައްޑޫސިޓީގައި ކޮވިޑް-19 ފެތުރުން ކޮންޓްރޯލް ކުރުމަށް އޮގަސްޓުމަހުގައި އެޅި ފިޔަވަޅުތަކަށް އަދި އެއްވެސް ބަދަލެއް ގެނެސްފައެއް ނުވެއެވެ. ފާއިތުވި ދެ ދުވަހުގެ ތެރޭގައި އައްޑޫއިން މި ބައްޔަށް 42 މީހުން ޕޮޒިޓިވްވެފައިވާއިރު، އައްޑޫގެ އެކްޓިވް ކޭސްތަކުގެ ޢަދަދު ވަނީ 277 އަށް އަރާފައެވެ.